کس قدر دھیان ہے اے کاکل پیچاں تیرا — شاہ اکبر داناپوری

Arooz is now on the App Store, for iPhone and iPad. Download →

شاہ اکبر داناپوری

کس قدر دھیان ہے اے کاکل پیچاں تیرا

اپنے سایہ سے الجھتا ہے پریشان تیرا

اپنی حسرت پہ لہو روئے ہر اک زخم جگر

گر پڑا ہاتھ سے قاتل جو نمک داں تیرا

کیا کہوں ہے مرے صحرا کی جو وسعت اے قیس

نہ ملے اس میں جو کھو جائے بیاباں تیرا

حوصلہ نکلے مری وحشت دل کا کیوں کر

دائرہ تنگ ہے اے عالم امکاں تیرا

لے گیا اس کی گلی تک نہ بہا کر لاشہ

چشم تر کام کچھ آیا مرے طوفاں تیرا

آج کل چلتی ہے دنیا میں قیامت کی ہوا

گل نہ ہو جائے چراغ اے مہ تاباں تیرا

خیر ہو بوئے رقابت مجھے آئی تجھ سے

چاک کس کے لئے اے گل ہے گریباں تیرا

کس طرف ڈھونڈھتا پھرتا ہے تو اے تیر افگن

دل میں اکبرؔ نے چھپا رکھا ہے پیکاں تیرا