کسی صورت سے اس محفل میں جا کر

کسی صورت سے اس محفل میں جا کر

مقدر ہم بھی دیکھیں آزما کر

تغافل کیش میں نے ہی بنایا

اسے حال دل شیدا سنا کر

اٹھا لینے سے تو دل کے رہا میں

تو اب ظالم وفا کر یا جفا کر

ترے گلشن میں پہنچے کاش اک دن

نسیم آشنائی راہ پا کر

خوشی ان کو مبارک ہو الٰہی

وہ خوش ہیں خاک میں مجھ کو ملا کر

دہن ہے رشک سے غنچے کا پرخوں

کدھر دیکھا تھا تم نے مسکرا کر

وہ شرماتے ہیں سن کر وصل کا نام

رہا ہوں میں جو چپ تو بات پا کر

ہوا وہ بے وفائی میں مسلم

نشان تربت عاشق مٹا کر

گناہ اپنے مجھے یاد آئے وحشتؔ

خجل سا رہ گیا میں ہاتھ اٹھا کر

kisi surat se is mahfil mein ja kar

muqaddar ham bhi dekhen azma kar

taghaful kesh main ne hi banaya

use hal-e-dil-e-shaida suna kar

utha lene se to dil ke raha main

to ab zalim wafa kar ya jafa kar

tire gulshan mein pahunche kash ik din

nasim-e-ashnai rah pa kar

khushi un ko mubarak ho ilahi

wo khush hain khak mein mujh ko mila kar

dahan hai rashk se ghunche ka purkhun

kidhar dekha tha tum ne muskura kar

wo sharmate hain sun kar wasl ka nam

raha hun main jo chup to bat pa kar

hawa wo be wafai mein musallam

nishan-e-turbat-e-ashiq mita kar

gunah apne mujhe yad ae wahshat

khajil sa rah gaya main hath utha kar