کسی کا دل کو رہا انتظار ساری رات

کسی کا دل کو رہا انتظار ساری رات

فلک کو دیکھا کئے بار بار ساری رات

تڑپ تڑپ کے تمنا میں کروٹیں بدلیں

نہ پایا دل نے ہمارے قرار ساری رات

ادھر تو شمع تھی گریاں ادھر تھے ہم گریاں

اسی طرح پہ رہے اشک بار ساری رات

خیال شمع رخ یار میں جلے تا صبح

لیا قرار نہ پروانہ وار ساری رات

نہ پوچھ سوز جدائی کو ہم سے اے ہم دم

جلا کیا یہ دل داغ دار ساری رات

مژہ کے عشق سے آئی نہ نیند آنکھوں میں

نظر کھٹکتی رہی بن کے خار ساری رات

خیال زلف سیہ میں بہا کئے آنسو

بندھا رہا مرے رونے کا تار ساری رات

نہ پوچھ ہم سے اثرؔ رات کس طرح کاٹی

عجب طرح کا رہا انتشار ساری رات

kisi ka dil ko raha intizar sari rat

falak ko dekha kiye bar bar sari rat

tarap tarap ke tamanna mein karwaten badlen

na paya dil ne hamare qarar sari rat

idhar to shama thi giryan idhar the ham giryan

isi tarah pe rahe ashk bar sari rat

khayal sham-e-rukh yar mein jale ta subh

liya qarar na parwana war sari rat

na puchh soz-e-judai ko ham se ai ham dam

jala kya ye dil-e-dagh dar sari rat

mizha ke ishq se ai na nind ankhon mein

nazar khatakti rahi ban ke khar sari rat

khayal-e-zulf-e-siyah mein baha kiye ansu

bandha raha mire rone ka tar sari rat

na puchh ham se asar rat kis tarah kati

ajab tarah ka raha intishar sari rat