Arooz is now on the App Store, for iPhone and iPad. Download →

All poetry

کس لیے پھرتے ہیں یہ شمس و قمر دونوں ساتھ

Nazm Tabatabai (1854–1933)

کس لیے پھرتے ہیں یہ شمس و قمر دونوں ساتھ

کس کو یہ ڈھونڈتے ہیں برہنہ سر دونوں ساتھ

کیسی یارب یہ ہوا صبح شب وصل چلی

بجھ گیا دل مرا اور شمع سحر دونوں ساتھ

بعد میرے نہ رہا عشق کی منزل کا نشاں

مٹ گئے راہرو و راہ گزر دونوں ساتھ

اے جنوں دیکھ اسی صحرا میں اکیلا ہوں میں

رہتے جس دشت میں ہیں خوف و خطر دونوں ساتھ

مجھ کو حیرت ہے شب عیش کی کوتاہی پر

یا خدا آئے تھے کیا شام و سحر دونوں ساتھ

اس نے پھیری نگۂ ناز یہ معلوم ہوا

کھنچ گیا سینے سے تیر اور جگر دونوں ساتھ

غم کو دی دل نے جگہ دل کو جگہ پہلو نے

ایک گوشے میں کریں گے یہ بسر دونوں ساتھ

اس کو روکوں میں الٰہی کہ سنبھالوں اس کو

کہ تڑپنے لگے دل اور جگر دونوں ساتھ

ناز بڑھتا گیا بڑھتے گئے جوں جوں گیسو

بلکہ لینے لگے اب زلف و کمر دونوں ساتھ

تجھ سے مطلب ہے نہیں دنیا و عقبیٰ سے غرض

تو نہیں جب تو اجڑ جائیں یہ گھر دونوں ساتھ

بات سننا نہ کسی چاہنے والے کی کبھی

کان میں پھونک رہے ہیں یہ گہر دونوں ساتھ

آندھیاں آہ کی بھی اشک کا سیلاب بھی ہے

دیتے ہیں دل کی خرابی کی خبر دونوں ساتھ

کیا کہوں زہرہ و خورشید کا عالم اے نظمؔ

نکلے خلوت سے جوں ہی وقت سحر دونوں ساتھ