کس نور کی مجلس میں مری جلوہ گری ہے

کس نور کی مجلس میں مری جلوہ گری ہے

جس نور سے پر نور یہ نور نظری ہے

آمد ہی میں حیران قیاس بشری ہے

یہ کون سی تصویر تجلی سے بھری ہے

گو حسن کا رتبہ نہیں مذکور ہوا ہے

منبر مرا ہم مرتبۂ طور ہوا ہے

صد شکر کہ مجلس مری مشتاق سخن ہے

یہ فیض عنایات حسین اور حسن ہے

پھر جوش جوانی پہ مری طبع کہن ہے

یہ قوت امداد شہ تشنہ دہن ہے

نقاش میں یہ صنعت تحریر نہیں ہے

تصویر دکھاتا ہوں یہ تقریر نہیں ہے

نقاش تو کرتا ہے قلم لے کے یہ تدبیر

اک شکل نئی صفحۂ قرطاس پہ تحریر

انصاف کرو کلک زباں سے دم تحریر

میں صفحۂ باطن میں رقم کرتا ہوں تصویر

سو رنگ سے تصویر مصور نے بھری ہے

رنیگنئ مضموں کی کہاں جلوہ گری ہے

تصویر میں اس شخص کی ہوں تم کو دکھاتا

جو ثانی محبوب الٰہی ہے کہاتا

اک نور جو جاتا ہے تو اک نور ہے آتا

وجہ عدم سایۂ احمد ہوں سناتا

تھا بعد محمد کے جو آیا علی اکبر

تھا احمد مختار کا سایہ علی اکبر

یاں تک سخن تازہ کیا طبع نے پیدا

وہ نور نبی اور نبی نورخدا کا

یہ سلسلۂ نور کہاں جا کے ہے پہنچا

اکبر کو جو دیکھا تو بتاؤ کسے دیکھا

واللہ زیارت کا سزا وار ہے اکبر

نعم البدل احمد مختار ہے اکبر

لیکن تمہیں تصویر یہ کرتی ہے اشارت

ہاں مجلسیاں روضۂ جنت کی بشارت

ہو محو طہارت ہے اگر قصد زیارت

ہے لازم و ملزوم زیارت کو طہارت

اس قصد پہ بیٹھے ہو جو صاحب نظرو تم

تجدید وضو اشک کے پانی سے کرو تم

لکھا ہے کہ تھی حضرت شبیر کو عادت

ہوتی تھی نماز سحری سے جو فراغت

پہلے علی اکبر ہی کو بلواتے تھے حضرت

فرماتے تھے کرتا ہوں عبادت میں عبادت

روشن ہو نہ کیوں چشم حسین ابن علی کی

کرتا ہوں زیارت میں جمال نبوی کی

کرتے علی اکبر تو جھکا فرق کو مجرا

ہر مرتبہ مل جاتا تھا پاؤں سے سر ان کا

تعظیم کو ہوتے تھے کھڑے سید والا

کہتے علی اکبر کہ یہ کیا کرتے ہو بابا

شہ کہتے تھے عادت تھی یہ محبوب خدا کی

تعظیم وہ کرتے تھے بتول عذرا کی

اے جان پدر ہے مجھے واجب تری توقیر

تو سر سے قدم تک ہے مرے نانا کی تصویر

تب جوڑ کے ہاتھوں کو وہ نو بادہ ٔ شبیر

گردن کو جھکا شرم سے کرتا تھا یہ تقریر

بس ختم شرافت ہوئی فرزندہ علی پر

رکھا ہے قدم آپ نے دوش نبوی پر

تب لیتے تھے پیشانی کا بوسہ شہ ذی شان

کہتے تھے کہ شیریں سختی پر تری قربان

زینب نے سنے راز و نیاز ان کے یہ جس آن

چلائی کہ دونوں پہ تصدق ہو مری جان

دیکھا نہ کوئی باپ اگر ابن علی سا

بیٹا بھی سنا ہے کوئی ہم شکل نبی سا

سن لو علی اکبر کی زیارت کا قرینہ

پہلے تو کدورت سے کرو صاف یہ سینہ

پھر دیدۂ باطن کو کرو دیدۂ بینا

تا جلوہ نما ہو رخ سلطان مدینہ

معلوم ہوا صفحۂ قرآں علی اکبر

تحقیق ہوا کعبۂ ایماں علی اکبر

قرآن کی تشبیہ یہ اس دل نے بتائی

پیشانیٔ انور ہے کہ ہے لوح طلائی

ابرو سے ہے بسم اللہ قرآں نظر آئی

جدول کشش زلف کی قاروں نے دکھائی

وہ زلف وہ بینی الف و لام رقم ہے

پر میم دہن مل کے یہ اک شکل الم ہے

اور کعبۂ دلہا کی یہ تمثیل ہے اظہر

یہ خال سیہ ہے حجر الاسود زیور

محراب حرم پیش نظر ابروے اکبر

یہ چاہ ذقن ہے چہ زمزم کے برابر

اس بینئ اقدس کا مجھے دھیان گر آیا

کعبہ میں دھرا نور کا منبر نظر آیا

دیکھو کہ صفا ہے رخ اکبر سے نمایاں

یاں سعی میں ہردم ہے دل زینب نالاں

کعبہ جو سیہ پوش ہے اے صاحب عرفاں

یاں بھی رخ انور پہ ہیں گیسوے ٔ پریشاں

اس زلف میں پابند دل شاہ امم ہے

زنجیر میں کعبے کی یہ قندیل حرم ہے

کیا قدر کوئی پائے مبارک کی سنادے

یہ رکن ہیں کعبہ کے اگر فہم خدادے

انصاف کرو تم کو خدا اس کی جزا دے

اس رکن کو یوں امت بے دین گرادے

حج تم نے کیا کعبے کا جب چشم ادھر ہے

معنی حج اکبر کے یہی ہیں جو نظر ہے

سب آتے ہیں کعبے نے یہ ہے مرتبہ پایا

یہ قبلۂ ایمان ہدایت کا جو آیا

آہوے حرم جان کے مجروح بنایا

اور خون کا دریا تھا ہر اک سمت بہایا

قربانی ہو کعبے میں یہ فرمان خدا ہے

یہ کعبہ تو امت ہی یہ قربان ہوا ہے

حسن علی اکبر تو سنایا نہیں جاتا

کچھ دل ہی مزا چشم تصور میں ہے پاتا

اس قد کا اگر باغ میں مذکور ہے آتا

تب سرو انگشت شہادت کو اٹھاتا

پیشانی تو آئینہ لب ریز صفا ہے

ابرو ہے کہ خود قبلہ ہے اور قبلہ نما ہے

مانند دعاے سحری قد رسا ہے

ماتھا ہے کہ دیباچہ انوار خدا ہے

دو زلف نے اک چاند سا منہ گھیر لیا ہے

وصل شب قدر و شب معراج ہوا ہے

دو زلفیں ہیں رخسار دل افروز بھی دو ہیں

ہاں شام بھی دو ہیں بہ خدا روز بھی دو ہیں

ہے چشم سیہ بس کہ تہہ ابروے خم دار

سو پنچۂ مژگاں کو اٹھائے تن بیمار

محراب کے نیچے یہ دعا کرتے ہیں ہربار

اس چشم جہاں بیں کو نہ پہنچے کوئی آزار

گیسو نہیں یہ سنبل فردوس نشاں ہیں

یہ چشم نہیں نرگس شہلائے جہاں ہیں

ہونٹوں سے کبو دی جو عطش کی ہے نمودار

ہوتا ہے دھواں آتش یاقوت سے اظہار

غصے سے جو ابرو میں شکن پڑتی ہے ہربار

ہالہ اسے سمجھے ہیں سرو ہی کا وہ کفار

ابرو جو ہر اک موے مبارک سے بھرا ہے

اعجاز سے شمشیر میں نیزوں کو دھرا ہے

اس ابرو و بینی میں یہ پائی گئی صورت

جس طرح مہ عید پہ انگشت شہادت

شمع حرم حق نے کیا سایۂ وحدت

گوہر یہ نیا لایا ہے غواص طبیعت

مطبوع ہر اک شکل سے پایا جو رقم کو

یاں رکھ دیا نقاش دو عالم نے قلم کو

خط جلوہ نما عارض گلگوں پہ ہوا ہے

مصحف کو کسی نے ورق گل پہ لکھا ہے

یہ چشم یہ قد حسن میں اعجاز نما ہے

ہاں اہل نظر سرو میں بادام لگا ہے

تیروں سے سوا ترکش مژگاں کا اثر ہے

دشمن کے لیے ریزۂ الماس جگر ہے

کانوں کا تہ زلف مسلسل ہے اشارہ

دو پھول ہیں سنبل میں نہاں وقت نظارا

کس کو صفت حسن بنا گوش کا یارا

خورشید سے دیکھو تو ٹپکتا ہے ستارا

چہرہ غرق آلودہ دم صف شکنی ہے

خورشید پہ ہر قطرۂ سنبل یمنی ہے

برگشتہ مژہ اس کی یہ کرتی ہے اشارے

برگشتگیٔ عمر کے سامان ہیں سارے

مژگاں کے یہ نیزے جو خمیدہ ہوئے بارے

دھڑکا ہے کہ نیزہ کوئی اکبر کو نہ مارے

یک چشم زدن میں جو فلک اس سے پھرے گا

اس چشم کے مانند یہ نیزوں سے گھرے گا

لب ہیں کہ ہے دریائے لطافت بہ سراوج

اس اوج میں پیدا یم قدرت کی ہوئی موج

ہیں فرد نزاکت میں مگر دیکھنے میں زوج

دو ہونٹ ہیں اور پیاس کی ہے چاروں طرف فوج

بند آنکھیں ہیں لب خشک ہیں اور عالم غش ہے

اور منہ میں زباں ماہی دریاے عطش ہے

کس منہ سے کرے اب کوئی مدح درد نداں

کچھ قدر نہیں در عدن کی جہاں چنداں

تارے سے چمکنے لگے جس دم ہوئے خنداں

مضمون یہ ہے قابل دشوار پسنداں

یہ قاعدہ کلی ہے نہ ہو مدح بشر سے

کلی کوئی جب تک نہ کرے آب گہر سے

گردن ہے کہ فوارۂ نور ازلی ہے

یہ دوش تو ہم دوش بدوش نبوی ہے

سینہ ہے کہ آئینہ وضع احدی ہے

دل صاف نظر آتا ہے آئینہ یہی ہے

ان ساعدو ساقین کے رتبے کہو کیا ہیں

یہ چار مگر ماہی دریاے صفا ہیں

پشتینوں سے یہ پشت ہے ہم پشت پیمبر

لیکن شہ مظلوم چڑھے پشت نبی پر

یہ پشت پہ شبیر کی بیٹھا ہے مکرر

لے فرق سے تانا خن پا نور سراسر

کیا فرق ہے موسیٰ میں اور اس ماہ لقا میں

واں ہاتھ میں اور یاں ید بیضا کف پا میں

اور تن پہ سلاح خربی خوبی سجا ہے

یہ خود نہیں سایہ افضال خدا ہے

نیزہ نہیں شبیر کا یہ دست دعا ہے

یا بانوۓ مغموم کی فریاد رسا ہے

چار آئینے میں چار طرف عکس پڑے ہیں

یا بہر مد دپنچ تن پاک کھڑے ہیں

شبیر تو اس کے تن عارض پہ فدا ہے

زینب کا تو پوچھو نہ جو کچھ حال ہوا ہے

عابد کو قلق اس کی جدائی کا بڑا ہے

بانو کا تو سر خاک یہ اس غم سے جھکا ہے

یہ چار نہیں پھول جو تزئین سپر ہیں

بالائے سپر چاروں کے یہ داغ جگر ہیں

یہ تیغ کلید در اقبال و ظفر ہے

ہر سمت کو وا جس کے لیے زخم کا در ہے

حلقہ یہ زرہ کا نہیں تن رشک قمر ہے

سو تن سے ملا دیدۂ ارباب نظر ہے

گھوڑا تو ہے خاکی پہ خمیر آب بقا ہے

گرمی میں جو آتش ہے تو سرعت میں ہوا ہے

میں چشم تصور میں لگا کھینچنے تصویر

بس ذہن میں سرعت سے نہ ٹھہرا کسی تدبیر

جب بندش مضمون میں باندھا دم تحریر

دی کلک نے آواز پری کو کیا تسخیر

ڈھیلی جو ہوئی باگ تصور کی ادھر سے

جوں عمر رواں ہوگیا معدوم نظر سے

اس گھوڑے کی سرعت کہو کیوں کر کروں مرقوم

جوں حرف غلط حرف ہوئے جاتے ہیں معدوم

کونین میں یہ تیز روی کے جو ہیں مفہوم

یاں ہوتا ہے معلوم نہ واں ہوتا ہے معلوم

مرقوم ثنا صفحۂ کاغذ پہ جہاں ہو

ہر حرف وہیں مورچے کی طرح رواں ہو

کیوں مومنو تصویر پیمبر نظر آئی

لیکن تمہیں کس وقت میں صورت یہ دکھائی

جب باپ میں اور بیٹے میں ہوتی ہے جدائی

بس خوش ہیں کہ ہم نے بھی رضا جنگ کی پائی

خود قید مصیبت سے تو آزاد ہوئے ہیں

ماں باپ یہاں مفت میں برباد ہوئے ہیں

اٹھارہواں سال ہوگیا ایسا اسے بھاری

یہ تیغ نظر کس کی اسے لگ گئی کاری

ماں باپ کی برباد ہوئیں حسرتیں ساری

یوں سامنے سے چاند سی تصویر سدھاری

حسرت کا مرادوں کا یہ ارمان کا دن تھا

اٹھارہ برس پال کے یہ موت کا سن تھا

ماں ہتی کہتی بیٹا مجھے پسا اپنے بلاؤ

شہ کہتے تھے اس سینے کی آتش کو بجھاؤ

سجاد یہ چلاتے تھے بستر سے اٹھاؤ

کہتی تھی سکینہ مجھے ٹوپی تو پنہاؤ

زینب یہی کہتی تھی کہ اے صاحبو کیا ہے

اٹھارہ برس والا بھی مرنے کو چلا ہے

اکبر کا یہ عالم ہے کہ بس روبہ قضا ہیں

اک منتظر آمد شاہ شہدا ہیں

کہنے سے جو چھٹتے ہیں تو مشغول بکا ہیں

جس روز سے پیدا ہوئے وہ نور خدا ہیں

اس روز سے ماں باپ کی چھاتی کے تلے ہیں

اور آج نکلتے ہیں تو مرنے کو چلے ہیں

بیٹا تو ادھر واسطے مرنے کے سدھارا

یاں شاہ نے سر چوب در خیمہ سے مارا

بانو نے ادھر ہائے پسر جب کہ پکارا

گھونسا سا لگا آ کے کلیجے میں دوبارا

کہتے ہیں کہ ہیں سامنے جاتے علی اکبر

لیکن نہیں ہم کو نظر آتے علی اکبر

ہیں خاک پہ بیٹھے ہوئے اور فرق جھکا ہے

فرماتے ہیں یہ مسند شاہ شہدا ہے

گہ سر کو اٹھاکر یہی مضمون دعا ہے

لے آج یہ بیٹا بھی تری نذر کیا ہے

راضی ہوں میں تو داغ پسر دیجیو مجھ کو

پر شرط یہ ہے صبر عطا کیجیو مجھ کو

ادنی ٰترا بندہ ہوں سو طاقت مری کیا ہے

اس داغ کا دل ہو متحمل تو مزا ہے

میرا بھی تو اب کوچ کا سامان لگا ہے

دوچار گھڑی کا یہ پس و پیش ذرا ہے

بانو پہ عجب طرح کی آفت یہ پڑی ہے

یارب تری لونڈی کی مجھے فکر بڑی ہے

آئی تھی یہاں چھوڑ کے شاہی کو وہ دل گیر

سو تونے دیا تھا شرف بستر شبیر

آزاد کیا لونڈیوں کو دے دے کے جاگیر

بیٹا جو ملا تھا سو محمد کی تھی تصویر

ہاں ایک یہ دولت اسے امداد ہوئی ہے

سو ہاتھ سے امت کے وہ برباد ہوئی ہے

ہے بازو کو تھامے ہوئے کنبہ مرا سارا

کہتی ہے کہ لوگو کہو آیا مرا پیارا

نیزہ تو ابھی اس کو کسی نے نہیں مارا

جیتا ہے تو پھر کیوں مجھے اب تک نہ پکارا

اب موت کے پھندے میں مرا ماہ جبیں ہے

بے میرے تو اک آن اسے چین نہیں ہے

ہنستے ہوئے آتے تھے جو رخصت کے ارادے

کہتے تھے کہ اماں تمہیں اب صبر خدا دے

میں نے کہا آہستہ سے سر اپنا لگادے

واری گئی اللہ تری پیاس بجھادے

رخصت کا سخن دیکھ نکلتے ہوئے لب سے

کی تھی ابھی کیا کیا مجھے تسلیم ادب سے

اے صاحبو اب خاک پہ بانو کو بٹھادو

کالی کفنی ہو تو مجھے لا کے پنہا دو

اس کوکھ پہ اب خاک کا پھایا بھی لگادو

جس راہ گیا ہو وہ مجھے راہ بتا دو

اس دھوپ میں راہی وہ مرا لال ہوا ہے

اب پیاس سے کیا جانیے کیا حال ہوا ہے

زینب نے کہا ہائے کہاں جاؤگی بھابھی

روکے در خیمہ کو کھڑے ہیں شہ عالی

اصغر ترا مرتا ہے اٹھالے اسے بی بی

بانو نے کہا آہ خبر ہے مجھے کس کی

اصغر سے تو امید نہیں چند نفس کی

لٹتی ہے کمائی مری اٹھارہ برس کی

ہے یاس کا یہ ساماں سنو دشت کا ساماں

واں جاتے ہیں خوش خوش علی اکبر سوئے میداں

سب عرش الہی کی سی شوکت ہے وہی شاں

آتا ہے بڑی دھوم سے جیسے کوئی سلطاں

کہتا ہے نقیب اجل انصاف کی جاہے

دیکھو کہ جواں مرنے کو کیا شیر چلا ہے

اک سمت رکاب اس کی ہے تھامے ہوئے حشمت

اور اک طرف باگ کو پکڑے ہوئے نصرت

شاطر کی طرح آگے قدم مارتی دولت

اقبال و ظفر چتر لگائے پئے خدمت

اک نور سے ہر چار طرف دشت بھرا ہے

اور حسن نے خود غاشیا کاندھے پہ دھراے

نہ لاکھ میں یہ رعب کی آمد ہے نہ سو میں

دل تھامے ہوئے احمد مختار جلو میں

روح اسداللہ چلی آتی ہے رو میں

اور فاطمہ رہوار کے پیچھے تگ ودو میں

لپٹی ہوئی بس گر دسواری سے اسی کی

آتی ہے چلی جان حسین ابن علی کی

واں فوج میں حیرت سے ہر اک شخص ہے تکتا

ہر دار کو سکتہ ہے کہ بس ہل نہیں سکتا

کہتا ہے کہ دیکھو تو ہے کیا نور چمکتا

ہر عضو سے ہے حسن خدا داد ٹپکتا

کیا نور ہے کیا دبدبہ کیا جلوہ گری ہے

خورشید بھی یاں مثل چراغ سحری ہے

ہم قیصر روم اس کو جو سمجھیں تو بجا ہے

فغفور کہیں چین کا تو اس سے سوا ہے

خاقان حتن گر کہیں اس کو تو خطا ہے

جن کہیے تو جن میں یہ کہاں حسن و ضیا ہے

واللہ خوشا باپ کہ یہ جس کا خلف ہے

پیدا ہے شرافت سے کہ یہ در نجف ہے

نذریں دو اسے چل کے اور اس فوج میں لاؤ

محکوم ہو تم سب اسے سردار بناؤ

یہ چتر مرصع سر اقدس پہ لگاؤ

شبیر کو بلوا کے یہ صورت تو دکھاؤ

کرتے ہیں بہت فخر گھرانے پہ نبی کے

بس یاں یہ مقابل ہے حسین ابن علی کے

بہتر ہے جو بلوا کے کہو کیوں شہ تنہا

تھا حسن کا اکبر کے نہایت تمہیں دعوا

اب لا کے کھڑا دونوں کو کردیجئے یک جا

دنیا میں پڑے بندۂ اللہ ہیں کیا کیا

گو حسن کا اکبر کے بھی عنوان یہی ہے

کیوں اے شہ ذی شان کہو شان یہی ہے

تشویش میں تھی فوج کہ اس میں علی اکبر

کرنے لگے میداں میں رجز خوانیاں بڑھ کر

ہوں یوسف گل پیرہن سبط پیمبر

جویائے خزان چمن حسرت مادر

ننھیال سے ددھیال سے یہ حسب و نسب ہے

اک شاہ عجم ایک شہنشاہ عرب ہے

سلطان کفن پوش ہوں در حق کا سناسا

ناشاد ہوں نکلا نہیں در مان ذرا سا

پوتا شہ مرداں کا ہوں کسرا کا نواسا

مظلوم کا مظلوم ہوں اور پیاسے کا پیاسا

تصویر مری جلد مٹاؤ کوئی آ کر

برچھی مرے سینے پہ لگاؤ کوئی آکر

یہ سنتے ہی لشکر میں تلاطم ہوا اک بار

سوچے کہ یہی ہے پسر حیدر کرار

ترغیب میں تو تھا عمر سعد بد اطوار

پر مستعد قتل ہوا ایک نہ زنہار

کہتے تھے اگر لاشے پہ لاشے ہی پڑیں گے

اس جان جہاں سے نہ لڑیں گے نہ لڑیں گے

لیکن یہاں اکبر کےہے دل میں یہی بس دھیان

اس قوم کے ہاتھوں سے ہوئے قتل چچا جان

واللہ کہ ہیں گبر سے بدتر یہ مسلمان

انسان جو ہوتے تو ہمیں جانتے انسان

ہے دل میں جو ارمان بھر اصف شکنی کا

لے نام علی قصد کرو تیغ زنی کا

بس دوش سے چلا وہ کماں کا جو اتارا

چلے کو بنا گوش تلک کھینچا قضا را

تھا عارض و پیکان و کماں کا یہ اشارا

خورشید ہے اور قوس ہے اور اس میں ستارا

اور اس کا یہ سرعت سے چلا وار کے اوپر

پیکان تھا ایک ایک کے رہوار کے اوپر

اکبر نے کہا ہے مرا مشہور گھرانا

دستور نہیں پہلے کوئی وار لگانا

واجب ہوا تم پر مجھے تلوار چلانا

کیوں ظالمو یوں آل محمد کو مٹانا

تم سب کو کروں قتل مرے سامنے کیا ہو

پانی مجھے مل جائے تو لڑنے کا مزا ہو

زخمی ہوئی سب فوج تو غصہ انہیں آیا

جھنجھلا کے لعنیوں نے نشانوں کو بڑھایا

جلوہ علموں نے بہ سر فوج دکھایا

یاں رانوں میں شہزادے نے گھوڑے کو دبایا

ہستی کو جلاتا تھا فقط نور کا شعلہ

تھا جلوہ نماچار طرف طور کا شعلہ

ابر سیہ ٔفوج کا ایسا ہوا طغیاں

جو چاند حسین ابن علی کا ہوا پنہاں

میداں میں اٹھا تھا غبار سم اسپاں

تاریک ہوا دیدۂ خورشید درخشاں

جاتی تھی چلی جان عدو چھوڑ کے تن کو

اکبر نے سیا سوزن مژگاں سے کفن کو

نیزے سے کہیں زخم لگاتا کہیں شمشیر

بینی کہیں ابرو کی کہیں چشم کی تصویر

تھا بسکہ تماشائی وہ نوبادہ ٔشبیر

خورشید کی عینک کو دھرے تھا فلک پیر

چار آئینہ یوں توڑ کے نیزہ وہ ادھر جائے

جس طرح کہ عینک سے نگہ صاف گزر جائے

تھا آب دم تیغ سے طوفان کا اسباب

تھی موج فنا سر سے گزرتا تھا پڑا آب

دریا تھا وہ لشکر تو ہر اک حقلہ تھا گرداب

اعضاے بریدہ صفت ماہی بے آب

آب دم خنجر پہ علم داروں کے دم تھے

جب تیغ علم کی تو علم صاف قلم تھے

یوں میان کے درمیان سے باہر ہوئی تلوار

جوں پھوٹ کے باہر نکل آئے بدن خار

اک قطرۂ آب اس کو جو کہئے ہے سزاوا

آتش مگر اس آب سے ہوتی تھی نمودار

تھا سرووہ نیزہ پہ ہوا دار بدوں کو

وہ سرو گراتا تھا مگر سروقدوں کو

شمشیر جو تھی رنگ میں الماس کی تمثال

مرجان کی تھی شاخ کہ بس خوں سے ہوئی لال

تیروں کے لعینوں کے تواتر پہ چلے بھال

مانند زرہ تھیں سپریں ہاتھوں میں غربال

تھی چشم زرہ پوش شجاعت کے جوبل میں

اک دم میں گرفتار ہوئے دام اجل میں

تھے کاسۂ سر دشمنوں کے ٹھوکریں کھاتے

وہ تخم شتر مرغ کی صورت نظر آتے

تیروں کے عقاب اپنی یہ صورت ہیں دکھاتے

طعمہ جگر لشکر اعدا کا بناتے

مجروح بس اک تیر میں سو سو کا جگر ہو

جس طرح کہ سودانوں میں رشتے کا گذر ہو

اک آن میں لشکر متفرق ہوا سارا

اک جا پہ ٹھہر کر ہوا اجماع دوبارا

نعرہ پسر سعد نے سرداروں کو مارا

اکبر سے کرو مکر کوئی جلد خدارا

زور اس میں ہیں تین اور اکیلا یہ جری ہے

حیدر ہے پیمبر ہے حسین ابن علی ہے

دو شخص تھے لشکر میں عراقین کے مشہور

تھا ابن علی اک تو اک صالح مغرور

استاد عرب تھے فن نیزہ میں وہ مقہور

کچھ مشورہ کر کرکے وہ لشکر سے ہوئے دور

اک روبرو اکبر کی زدوکشت پر آیا

نیزے کو ہلاتا ہوا اک پشت پر آیا

دونوں سے غرض چلنے لگے نیزہ خوں خوار

گہہ اس کا گہے اس کا کھڑے روکتے تھے وار

اک برق الٹتی تھی پلٹتی تھی ہر اک بار

گھوڑا تھا دیا کل کا بنایا ہوا رہوار

نیزہ وہ نہ تھا شعلۂ جوالہ ہوا تھا

گرد مہ رخسار عجب بالہ ہوا تھا

کہتے تھے ملک جرأت اکبر یہ فدا ہیں

گویا احد وبدر میں محبوب خدا ہیں

جن کہتے تھے خود آج علی گرم وغا ہیں

دو دو سے تو لڑتے ہیں مگر ہوش بجاہیں

حوریں یہی کہتی تھیں کہ زہرا جو رضا دیں

کوثر کا بھرا جام ابھی لا کے پلا دیں

حوروں سے یہ فرماتی تھیں خاتون قیامت

اک آدھ گھڑی اور ہے یہ پیاس کی شدت

کیا ہووے گی اس مادر غم دیدہ کی حالت

اس لال کے لینے کو گئے شاہ ولایت

اک دم میں کلیجہ یہ سناں کھاتا ہے اکبر

حورو لب کوثر پر چلا آتا ہے اکبر

یاں وار کیا پشت پہ صالح نے قضارا

اکبر نے پلٹ کر وہیں نیزہ اسے مارا

اتنے ہی پلٹنے نے غضب کردیا سارا

بس سر کے بل آیا نہ رہا سانس کا یارا

واں شاہ گرے بانو کو غش آگیا گھر میں

اک نیزے نے سوراخ کئے تین جگر میں

جب توڑ کلیجے کو گیا پشت میں بھالا

تھرا گئے اکبر تو اٹھا سینے سے نالا

اللہ ری جرأت وہیں نیزے کو نکالا

غش آگیا ہر چند بہت دل کو سنبھالا

جب چھائی اجل اس دل مایوس کے اوپر

کس یاس سے سر رکھ دیا قربوس کے اوپر

تھیں برچھیاں بھی نیزے بھی تلواریں بھی ہرسو

عمامہ بھی پرزے ہوا کٹ کٹ گئے گیسو

کہتے تھے کہ آتی نہیں بابا کی کہیں بو

کی گھوڑے نے اپنے سے بچانے میں تگ و دو

وارث تو نہ تھا کوئی بہ جز پنج تن اس کا

جس طرح سے چاہا کیا ٹکڑے بدن اس کا

شادی سے لگے چار طرف لوگ اچھلنے

اس شور میں دی کوچ کی آواز دہل نے

کہتے تھے کہ مت دیجیو زخمی کو نکلنے

بس باگ پکڑلی وہیں گھوڑے کی اجل نے

پاتا نہ کہیں راہ نکلنے کو وہاں تھا

گھوڑا صفت تختہ ٔتابوت رواں تھا

یاں شاہ کو ناگہ دل اکبر نے ندا دی

کیا بیٹھے ہو واں بجتے ہیں نقارۂ شادی

نانا کی جو تصویر تھی اعدا نے مٹا دی

حضرت نے وہیں خاک پہ دستار گرادی

زینب کو صدا دی کہ بہن مرگئے اکبر

بھاوج سے خبردار سفر کر گئے اکبر

لکھا ہے کہ نعرہ وہاں شبیر نے مارا

جس نعرے سے سب دشت بلا ہل گیا سارا

گھبراتا تھا یوں شیر الٰہی کا وہ پیارا

بچہ کہیں جوں شیر کا کھوتا ہے قضارا

جب کرتے تھے غل ہائے علی وائے علی کا

تھا جھوم رہا عرش جناب احدی کا

کہتے تھے ملک شاہ کو اکبر سے ملادے

یا تو ہمیں دنیا میں اترنے کی رضا دے

دنیا کی رضا دے ہمیں اور حکم وغا دے

ان ظالموں کو صفحۂ ہستی سے مٹا دے

یعقوب ہے یہ دشت ہے بیت الحزن اس کا

ہاں جلد ملا یوسف گل پیرہن اس کا

خالق کی صدا آئی فرشتوں کو کہ جاؤ

مردا اسے فرزند کالے جاکے دکھاؤ

ناشاد کو بچھڑے ہوئے بیٹے سے ملاؤ

شبیر اگر مانے تو دکھ درد بٹاؤ

ہے اس پہ مسلط کیا اس واسطے غم کو

یہ صبر حسین ابن علی بھاتا ہے ہم کو

یاں متصل فوج جو پہنچے شہ ذی جاہ

ہر ایک سے کہتے تھے بتاؤ مجھے لللہ

جس خاک پہ تم سب نے گرایا ہے مراماہ

گم ہوگیا بیٹا مرا روکو نہ مری راہ

ہے حق بہ طرف اب جو مرا حال دگر ہے

دنیا میں کسی باپ کا اکبر سا پسر ہے

تم سب نے مرا لال ہے کس طرح کا مارا

سنتا ہوں کہ مجروح کلیجہ کیا سارا

مجھ باپ کو دیکھو کہ رہا محو نظارا

دل ہل گیا جب یا ابتا اس نے پکارا

لو پاس کا انسان دکھائی نہیں دیتا

اب کچھ مجھے آنکھوں سے سجھائی نہیں دیتا

سب گھر تو مرا صاف کیا تم نے جفا سے

کیسے مرے دل دار کیے ذبح پیاسے

جس شخص میں ہوں رحم کے آثار ذرا سے

وہ ہاتھ مرا تھام لے اب ڈر کے خدا سے

جس راہ سدھارا وہ مجھے راہ بتادو

بس دور سے لاشہ علی اکبر کا دکھادو

ڈرتے ہو تو آؤ مری شمشیر و سپر لو

اندیشہ جو ہو دل میں تو قیدی مجھے کرلو

تم گر دچلو اور مجھے بیچ میں دھرلو

دو لال مرا مجھ کو مرے جسم سے سرلو

سید پہ کرو رحم مسلمان سمجھ کر

کیا ترس بھی آتا نہیں انسان سمجھ کر

ناگاہ صدا دور سے یہ کان میں آئی

کیوں قبلہ حاجات بڑی دیر لگائی

کس وقت میں حضرت نے مری یاد بھلائی

اس کی خبر اماں نے بھی پائی کہ نہ پائی

وہ سامنے میرے ملک الموت کھڑا ہے

جلد آئیے اب درد کلیجے میں بڑا ہے

سن کر یہ صدا کچھ تو ہوا دل کو سہارا

چلائے کہ ہے ڈھونڈھ رہا باپ تمہارا

ہم کیا کریں بیٹا نہیں کچھ جرم ہمارا

آخر ہوا جاکر یہ سر نعش گزارا

دیکھا کہ ہے بیٹھا ہوا گھوڑا تو زمیں پر

تن خاک پہ گردن ہے دھری خانۂ زیں پر

چھاتی پہ دھرا ہاتھ ہے اور خوں ہے ابلتا

تھم تھم کے لہو سانس کے ہم راہ نکلتا

منہ زرد ہے جس طرح کہ خورشید ہو ڈھلتا

ماتھے پہ عرق آیا ہے اور دل ہے اچھلتا

مشتاق پدر دیر سے ہر چند ہیں آنکھیں

کھلتی ہیں کبھی اور کبھی بند ہیں آنکھیں

بے ساختہ اس دم شہ مظلوم پکارے

لو جان پدر آئے ہیں ہم پاس تمہارے

بولا نہ گیا جب کیے ابرو سے اشارے

رکھ دیجئے نعلین کو سینے پہ ہمارے

جینے کی نہ دنیا کی نہ کوثر کی ہوس ہے

اس وقت مجھے زانوے مادر کی ہوس ہے

حضرت نے اسے گود میں پہلے تو سنبھالا

پھر پھول کے مانند اٹھا گھوڑے پہ ڈالا

اکبر نے کہا آہ مرا زخم ہے آلا

شہ نے کہا ہے ناوک دل اور یہ نالا

اس درد کی شدت میں جو لے جاؤں تو کیوں کر

جیتا ہو اماں تک تمہیں پہنچاؤں تو کیوں کر

گر درد یہی ہے تو گزر جاؤ گے اکبر

ماں تک بھی نہ پہنچو گے کہ مرجاؤ گے اکبر

بے کس پدر پیر کو کرجاؤ گے اکبر

میں بھی وہیں جاؤں گا جدھر جاؤ گے اکبر

یہ آخری دیدار اسے دکھلاؤ تو بہتر

جیتے ہوئے ماں تک جو پہنچ جاؤ تو بہتر

تھے با سرعریاں تو حسین آپ روا نا

خود باگ کو تھامے ہوئے سلطان زمانا

کہتے تھے کہ گھوڑے قدم آہستہ بڑھانا

تو زخم نہ اکبر کے کلیجے کا دکھانا

فرزند کا بانو کے بدن چور ہے گھوڑے

یہ مجھ کو دکھانا اسے منظور ہے گھوڑے

گھوڑا تو رواں ہوتا تھا ہر چند کو تھم تھم

ہر گام پہ بس ٹوٹنے لگتا تھا یہاں دم

دس بیس قدم اس نے اٹھائے نہ تھے پیہم

یاں ہونے لگا سانس کابس اور ہی عالم

خیمہ رہا نزدیک تو اتنی ہی تکاں میں

روح علی اکبر گئی گلزار جناں میں

پانو نے یہاں دیکھ لیا شاہ کا سایا

چلائی کہ صاحب کہو یوسف مرا آیا

تم نے اسے کس واسطے گھوڑے پہ لٹایا

قربوس پہ رخسار ہے کیوں اس نے جھکایا

وہ دور وہ طاقت وہ توانائی کہاں ہے

لٹکائے ہوئے ہاتھ مرا شیر جواں ہے

مردہ نظر آیا اسے جب متصل آئے

مردے ہی سے ملنے کے لیے ہاتھ بڑھائے

ناموس محمد نے عجب شور مچائے

مل جل کے وہ ہاتھوں پہ اٹھا خیمے میں لائے

اس شیر کے مردے پہ بھی اک رعب بڑا تھا

بس خون میں ڈوبا ہوا اک چاند پڑا تھا

بانو نے غرض بیٹھ کے زانو پہ لیا سر

گیسو کو اٹھا چاند سا مکھڑا کیا باہر

چلائی کہ دو صاحبو پرسا مجھے آکر

نوحہ میں پڑھوں تم کہو ہے ہے علی اکبر

برباد یہاں بانو کی دولت گئی لوگو

اٹھارہ برس کی مری محنت گئی لوگو

اکبرکی وہ دانائیاں اب لگتی ہیں جوں تیر

جب شہ سے رضا جنگ کی لائے تھے بہ تدبیر

منظور ہو اماں سے بھی بخشائیے اب شیر

کرتی تھی زباں شرم سے لکنت دم تقریر

میں نے کہا ہم جان کو واریں علی اکبر

صدقے ہوئیں یہ دودھ کی دھاریں علی اکبر

پھر بانو نے اس زخم سے ہاتھ اپنا اٹھایا

منہ اپنا جھکا کر اسے آنکھوں سے لگایا

بس الفت مادر نے جو اک جوش سا کھایا

اکبر کا دل اس زخم کے رستے نکل آیا

سب دیکھتے تھے فرط محبت کے چلن سے

تادیر وہ لپٹا رہا مادر کے دہن سے

اور آئ صدا پانی نہ ہاتھ آیا ذرا سا

اماں میں پیاسا رہا پیاسا رہا پیاسا

اب چھوڑ دو دامن مرا اے حق کی شناسا

اب مرنے کو جاتا ہے محمد کا نواسا

لاشے پہ مرے آپ نے وہ بین کیا ہے

اس روح پر ارمان کو بے چین کیا

یہ سنتے ہی غش ہوگئی بانو جگر افگار

سب گرد کھڑے ہوگئے گھبرا کے بس اک بار

فرصت جو ملی اتنی تو بادیدۂ خوںبار

لاشے کو اٹھا لے گئے باہر شہ ابرار

باقی علی اصغر کے سوا کوئی نہیں ہے

اب خنجر بے داد و گلوے شہ دیں ہے

جس سال کہے وصف یہ ہم شکل نبی کے

سن بارہ سے انچاس تھے ہجری نبوی کے

آگے تو یہ اندازہ سخن تھے نہ کسی کے

اب سب یہ مقلد ہوئے اس طرز نوی کے

دس میں کہوں سو میں کہوں یہ ورد ہے میرا

جو جو کہے اس طرز میں شاگرد ہے میرا

ہاں کلک بس اب آگے نہیں طاقت تحریر

ہو اور زیادہ تری تحریر میں تاثیر

کہتا ہے ضمیر اب کہ براے شہ دل گیر

محبوب علی جان نبی حضرت شبیر

اس مرثیے کا بس یہ خدا مجھ کو صلا دے

اکبر کا تصدق مری اولاد جلادے

kis nur ki majlis mein miri jalwa giri hai

jis nur se pur nur ye nur-e-nazari hai

amad hi mein hairan qayas-e-bashari hai

ye kaun si taswir tajalli se bhari hai

go husn ka rutba nahin mazkur hua hai

mimbar mira ham martaba-e-tur hua hai

sad shukr ke majlis miri mushtaq sukhan hai

ye faiz-e-inayat hasin aur husn hai

phir josh-e-jawani pe miri tab-e-kuhan hai

ye quwwat imdad shah-e-tishna dahan hai

naqqash mein ye sanat tahrir nahin hai

taswir dikhata hun ye taqrir nahin hai

naqqash to karta hai qalam le ke ye tadbir

ik shakl nai safha-e-qirtas pe tahrir

insaf karo kilk zaban se dam-e-tahrir

main safha-e-batin mein raqam karta hun taswir

sau rang se taswir musawwir ne bhari hai

ranigini-e-mazmun ki kahan jalwa giri hai

taswir mein us shakhs ki hun tum ko dikhata

jo sani mahbub-e-ilahi hai keita

ik nur jo jata hai to ik nur hai ata

wajh-e-adam saya-e-ahmad hun sunata

tha baad mohammad ke jo aya ali akbar

tha ahmad-e-mukhtar ka saya ali akbar

yan tak sukhan-e-taza kiya taba ne paida

wo nur-e-nabi aur nabi nurkhuda ka

ye silsila-e-nur kahan ja ke hai pahuncha

akbar ko jo dekha to batao kise dekha

wallah ziyarat ka saza war hai akbar

naam albadal ahmad mukhtar hai akbar

lekin tumhen taswir ye karti hai isharat

han majlisiyan rauza-e-jannat ki basharat

ho mahw-e-taharat hai agar qasd ziyarat

hai lazim-o-malzum ziyarat ko taharat

is qasd pe baithe ho jo sahab nazaro tum

tajdid-e-wuzu ashk ke pani se karo tum

likha hai ke thi hazrat-e-shabbir ko adat

hoti thi namaz-e-sahari se jo faraghat

pahle ali akbar hi ko biloite the hazrat

farmate the karta hun ibadat mein ibadat

raushan ho na kyun chashm-e-hasin ibn-e-ali ki

karta hun ziyarat mein jamal nabwi ki

karte ali akbar to jhuka farq ko mujra

har martaba mil jata tha paon se sar un ka

taazim ko hote the khare sayyad wala

kahte ali akbar ke ye kya karte ho baba

shah kahte the adat thi ye mahbub-e-khuda ki

taazim wo karte the batul-e-azra ki

ai jan-e-pidar hai mujhe wajib tiri tauqir

tu sar se qadam tak hai mire nana ki taswir

tab jor ke hathon ko wo nau bada shabbir

gardan ko jhuka sharm se karta tha ye taqrir

bas khatm sharafat hui farzinda ali par

rakha hai qadam ap ne dosh nabwi par

tab lete the peshani ka bosa shah zi shan

kahte the ke shirin sakhti par tiri qurban

zinib ne sune raz-o-niyaz un ke ye jis an

chillai ke donon pe tasadduq ho miri jan

dekha na koi bap agar ibn-e-ali sa

beta bhi suna hai koi ham shakl nabi sa

sun lo ali akbar ki ziyarat ka qarina

pahle to kudurat se karo saf ye sina

phir dida-e-batin ko karo dida-e-bina

ta jalwa numa ho rukh sultan-e-madina

maalum hua safha-e-quran ali akbar

tahqiq hua kaaba-e-iman ali akbar

quran ki tashbih ye is dil ne batai

peshani-e-anwar hai ke hai lauh-e-tilai

abru se hai bism allah quran nazar ai

jadwal kashish-e-zulf ki qarun ne dikhai

wo zulf wo bini alif-o-lam raqam hai

par mem dahan mil ke ye ik shakl-e-alam hai

aur kaaba-e-dulha ki ye tamsil hai azhar

ye khal-e-siyah hai hajr illasud zewar

mehrab-e-haram pesh-e-nazar abrwe akbar

ye chah-e-zaqan hai cha zamzam ke barabar

is bini-e-aqdas ka mujhe dhyan gar aya

kaaba mein dhara nur ka mimbar nazar aya

dekho ke safa hai rukh-e-akbar se numayan

yan sai mein hardam hai dil-e-zinib nalan

kaaba jo siyah posh hai ai sahab-e-irfan

yan bhi rukh-e-anwar pe hain gisiwe pareshan

is zulf mein paband-e-dil shah-e-umam hai

zanjir mein kaabe ki ye qindil-e-haram hai

kya qadr koi pae mubarak ki sunade

ye rukan hain kaaba ke agar fahm khudade

insaf karo tum ko khuda us ki jaza de

is rukan ko yun ummat be din garade

haj tum ne kiya kaabe ka jab chashm idhar hai

maani haj-e-akbar ke yahi hain jo nazar hai

sab ate hain kaabe ne ye hai martaba paya

ye qibla-e-iman hidayat ka jo aya

ahuwe haram jan ke majruh banaya

aur khun ka dariya tha har ik samt bahaya

qurbani ho kaabe mein ye farman khuda hai

ye kaaba to ummat hi ye qurban hua hai

husn ali akbar to sunaya nahin jata

kuchh dil hi maza chashm-e-tasawwur mein hai pata

is qad ka agar bagh mein mazkur hai ata

tab sarw-e-angusht shahadat ko uthata

peshani to aina lab rez safa hai

abru hai ke khud qibla hai aur qibla numa hai

manind-e-dae sahari qad rasa hai

matha hai ke dibacha anwar-e-khuda hai

do zulf ne ik chand sa munh gher liya hai

wasl-e-shab-e-qadar-o-shab meraj hua hai

do zulfen hain rukhsar dil afroz bhi do hain

han sham bhi do hain ba khuda roz bhi do hain

hai chashm-e-siyah bas ke tah-e-abrwe kham dar

so pancha-e-mizhgan ko uthae tan bimar

mehrab ke niche ye dua karte hain harbar

us chashm-e-jahan bin ko na pahunche koi azar

gesu nahin ye sumbul-e-firdaus nishan hain

ye chashm nahin nargis shahlae jahan hain

honton se kabo di jo atash ki hai numudar

hota hai dhuan atish yaqut se izhar

ghusse se jo abru mein shikan parti hai harbar

hala use samjhe hain sarw hi ka wo kuffar

abru jo har ik mue mubarak se bhara hai

ejaz se shamshir mein nezon ko dhara hai

is abru-o-bini mein ye pai gai surat

jis tarah mah-e-eid pe angusht shahadat

sham-e-haram haq ne kiya saya-e-wahdat

gauhar ye naya laya hai ghawwas tabiat

matbu har ik shakl se paya jo raqam ko

yan rakh diya naqqash do alam ne qalam ko

khat jalwa numa ariz-e-gulgun pe hua hai

mushaf ko kisi ne waraq-e-gul pe likha hai

ye chashm ye qad husn mein ejaz numa hai

han ahl-e-nazar sarw mein badam laga hai

tiron se siwa tarkash-e-mizhgan ka asar hai

dushman ke liye reza-e-almas jigar hai

kanon ka tah-e-zulf-e-musalsal hai ishara

do phul hain sumbul mein nihan waqt nazara

kis ko sifat-e-husn bana gosh ka yara

khurshid se dekho to tapakta hai sitara

chehra gharq aluda dam saf shikani hai

khurshid pe har qatra-e-sumbul yamni hai

bargashta mizha us ki ye karti hai ishare

bargashtagi-e-umr ke saman hain sare

mizhgan ke ye neze jo khamida hue bare

dharka hai ke neza koi akbar ko na mare

yak chashm-e-zadan mein jo falak us se phirega

us chashm ke manind ye nezon se ghirega

lab hain ke hai dariya-e-latafat ba sarauj

is auj mein paida yam qudrat ki hui mauj

hain fard nazakat mein magar dekhne mein zoj

do hont hain aur pyas ki hai charon taraf fauj

band ankhen hain lab khushk hain aur alam ghash hai

aur munh mein zaban mahi dariya-e-atash hai

kis munh se kare ab koi madh dard nidan

kuchh qadr nahin dar-e-adan ki jahan chandan

tare se chamakne lage jis dam hue khandan

mazmun ye hai qabil dushwar pasandan

ye qaida kali hai na ho madh bashar se

kali koi jab tak na kare ab-e-guhar se

gardan hai ke fawwara-e-nur-e-azali hai

ye dosh to ham dosh badosh nabwi hai

sina hai ke aina waz-e-ahadi hai

dil saf nazar ata hai aina yahi hai

un saido saqyun ke rutbe kaho kya hain

ye char magar mahi dariya-e-safa hain

pushtainon se ye pusht hai ham pusht payambar

lekin shah-e-mazlum charhe pusht-e-nabi par

ye pusht pe shabbir ki baitha hai mukarrar

le farq se tana khan pa nur sarasar

kya farq hai musa mein aur us mah liqa mein

wan hath mein aur yan yad-e-baiza kaf pa mein

aur tan pe silah kharbi khubi saja hai

ye khud nahin saya ifzal khuda hai

neza nahin shabbir ka ye dast-e-dua hai

ya bano-e-maghmum ki fariyad rasa hai

char aine mein char taraf aks pare hain

ya bahr mad-e-dapnach tan pak khare hain

shabbir to us ke tan ariz pe fida hai

zinib ka to puchho na jo kuchh hal hua hai

abid ko qalaq us ki judai ka bara hai

bano ka to sar khak ye is gham se jhuka hai

ye char nahin phul jo tazin-e-sipar hain

bala-e-sipar charon ke ye dagh-e-jigar hain

ye tegh kilid-e-dar iqbal-o-zafar hai

har samt ko wa jis ke liye zakhm ka dar hai

halqa ye zira ka nahin tan rashk-e-qamar hai

so tan se mila dida-e-arbab-e-nazar hai

ghora to hai khaki pe khamir ab-e-baqa hai

garmi mein jo atish hai to surat mein hua hai

main chashm-e-tasawwur mein laga khinchne taswir

bas zehn mein surat se na thahra kisi tadbir

jab bandish-e-mazmun mein bandha dam tahrir

di kilk ne awaz pari ko kiya taskhir

dhili jo hui bag tasawwur ki idhar se

jun umr-e-rawan hogaya maadum nazar se

is ghore ki surat kaho kyun kar karun marqum

jun harf-e-ghalat harf hue jate hain maadum

kaunain mein ye tez rawi ke jo hain mafhum

yan hota hai maalum na wan hota hai maalum

marqum sana safha-e-kaghaz pe jahan ho

har harf wahin morche ki tarah rawan ho

kyun momino taswir payambar nazar ai

lekin tumhen kis waqt mein surat ye dikhai

jab bap mein aur bete mein hoti hai judai

bas khush hain ke ham ne bhi raza jang ki pai

khud qaid musibat se to azad hue hain

man bap yahan muft mein barbad hue hain

attharawan sal hogaya aisa use bhari

ye tegh-e-nazar kis ki use lag gai kari

man bap ki barbad huin hasraten sari

yun samne se chand si taswir sidhari

hasrat ka muradon ka ye arman ka din tha

atthara baras pal ke ye maut ka sun tha

man hatti kahti beta mujhe pisa apne bulao

shah kahte the is sine ki atish ko bujhao

sajjad ye chillate the bistar se uthao

kahti thi sakina mujhe topi to panhao

zinib yahi kahti thi ke ai sahabo kya hai

atthara baras wala bhi marne ko chala hai

akbar ka ye alam hai ke bas ruba qaza hain

ik muntazir-e-amad shah-e-shuhada hain

kahne se jo chhutte hain to mashghul buka hain

jis roz se paida hue wo nur-e-khuda hain

us roz se man bap ki chhati ke tale hain

aur aj nikalte hain to marne ko chale hain

beta to idhar waste marne ke sidhara

yan shah ne sar chob-e-dar khema se mara

bano ne idhar hae pisar jab ke pukara

ghunsa sa laga a ke kaleje mein dobara

kahte hain ke hain samne jate ali akbar

lekin nahin ham ko nazar ate ali akbar

hain khak pe baithe hue aur farq jhuka hai

farmate hain ye masnad shah-e-shuhada hai

gah sar ko uthakar yahi mazmun dua hai

le aj ye beta bhi tiri nazr kya hai

razi hun main to dagh-e-pisar dijiyo mujh ko

par shart ye hai sabr ata kijiyo mujh ko

adna tira banda hun so taqat miri kya hai

is dagh ka dil ho mutahammil to maza hai

mera bhi to ab kuch ka saman laga hai

dochar ghari ka ye pas-o-pesh zara hai

bano pe ajab tarah ki afat ye pari hai

yarab tiri laundi ki mujhe fikr bari hai

ai thi yahan chhor ke shahi ko wo dil gir

so tune diya tha sharaf-e-bistar shabbir

azad kya laundiyon ko de de ke jagir

beta jo mila tha so mohammad ki thi taswir

han ek ye daulat use imdad hui hai

so hath se ummat ke wo barbad hui hai

hai bazu ko thame hue kumba mira sara

kahti hai ke logo kaho aya mira pyara

neza to abhi us ko kisi ne nahin mara

jita hai to phir kyun mujhe ab tak na pukara

ab maut ke phande mein mira mah-e-jabin hai

be mere to ik an use chain nahin hai

hanste hue ate the jo rukhsat ke irade

kahte the ke aman tumhen ab sabr khuda de

main ne kaha ahista se sar apna lagade

wari gai allah tiri pyas bujhade

rukhsat ka sukhan dekh nikalte hue lab se

ki thi abhi kya kya mujhe taslim adab se

ai sahabo ab khak pe bano ko bithado

kali kafani ho to mujhe la ke panha do

is kokh pe ab khak ka phaya bhi lagado

jis rah gaya ho wo mujhe rah bata do

is dhup mein rahi wo mira lal hua hai

ab pyas se kya janiye kiya hal hua hai

zinib ne kaha hae kahan jaogi bhabhi

roke dar-e-khema ko khare hain shah ali

asghar tira marta hai uthille use bi bi

bano ne kaha ah khabar hai mujhe kis ki

asghar se to ummid nahin chand nafas ki

lutti hai kamai miri atthara baras ki

hai yas ka ye saman suno dasht ka saman

wan jate hain khush khush ali akbar su-e-maidan

sab arsh-e-ilahi ki si shaukat hai wahi shan

ata hai bari dhum se jaise koi sultan

kahta hai naqib-e-ajal insaf ki jahai

dekho ke jawan marne ko kya sher chala hai

ik samt rikab us ki hai thame hue hashmat

aur ik taraf bag ko pakre hue nusrat

shatir ki tarah age qadam marti daulat

iqbal-o-zafar chitr lagae piye khidmat

ik nur se har char taraf dasht bhara hai

aur husn ne khud ghashiya kandhe pe dharai

na lakh mein ye rob ki amad hai na so main

dil thame hue ahmad-e-mukhtar jilau mein

ruh-e-asadalla chali ati hai rau mein

aur fatima rahwar ke pichhe tag wado mein

lipti hui bas gar disoari se usi ki

ati hai chali jan hasin ibn-e-ali ki

wan fauj mein hairat se har ik shakhs hai takta

har dar ko sakta hai ke bas hal nahin sakta

kahta hai ke dekho to hai kya nur chamakta

har uzw se hai husn khuda dad tapakta

kya nur hai kya dabdaba kya jalwa giri hai

khurshid bhi yan misl-e-charagh-e-sahari hai

ham qaisar rom us ko jo samjhen to baja hai

faghfur kahin chain ka to us se siwa hai

khaqan hatan gar kahin us ko to khata hai

jin kahiye to jin mein ye kahan husn-o-ziya hai

wallah khusha bap ke ye jis ka khalaf hai

paida hai sharafat se ke ye dar-e-najaf hai

nazren do use chal ke aur is fauj mein lao

mahkum ho tum sab use sardar banao

ye chitr murassaa sar-e-aqdas pe lagao

shabbir ko balwa ke ye surat to dikhao

karte hain bahut fakhr gharane pe nabi ke

bas yan ye muqabil hai hasin ibn-e-ali ke

behtar hai jo balwa ke kaho kyun shah tanha

tha husn ka akbar ke nihayat tumhen daawa

ab la ke khara donon ko kirdijiye yak ja

duniya mein pare banda-e-allah hain kya kya

go husn ka akbar ke bhi unwan yahi hai

kyun ai shah-e-zi shan kaho shan yahi hai

tashwish mein thi fauj ke is mein ali akbar

karne lage maidan mein rajaz khwaniyan barh kar

hun yusuf gul pairahan-e-sibt-e-payambar

joya-e-khuzzin chaman hasrat madar

nanhyal se dadhyal se ye hasb-o-nasab hai

ik shah ajam ek shahanshah-e-arab hai

sultan kafan posh hun dar haq ka sunasa

nashad hun nikla nahin dar man zara sa

pauta shah-e-mardan ka hun kisra ka nawasa

mazlum ka mazlum hun aur pyase ka pyasa

taswir miri jald mitao koi a kar

barchhi mire sine pe lagao koi akar

ye sunte hi lashkar mein talatum hua ik bar

soche ke yahi hai pisar-e-haidar karrar

targhib mein to tha umr-e-saad bad atwar

par mustaid-e-qatl hua ek na zinhar

kahte the agar lashe pe lashe hi parenge

us jan-e-jahan se na larenge na larenge

lekin yahan akbar kehai dil mein yahi bas dhyan

is qaum ke hathon se hue qatl chacha jan

wallah ke hain gabr se badtar ye musalman

insan jo hote to hamen jante insan

hai dil mein jo arman bhar asaf shikani ka

le nam-e-ali qasd karo tegh zani ka

bas dosh se chilla wo kaman ka jo utara

chale ko bana gosh talak khincha qaza ra

tha ariz-o-paikan-o-kaman ka ye ishara

khurshid hai aur qaus hai aur is mein sitara

aur us ka ye surat se chala war ke upar

paikan tha ek ek ke rahwar ke upar

akbar ne kaha hai mira mashhur gharana

dastur nahin pahle koi war lagana

wajib hua tum par mujhe talwar chalana

kyun zalimo yun al-e-mohammad ko mitana

tum sab ko karun qatl mire samne kya ho

pani mujhe mil jae to larne ka maza ho

zakhmi hui sab fauj to ghussa unhen aya

jhanjhla ke laaniyon ne nishanon ko barhaya

jalwa ilmon ne ba sar-e-fauj dikhaya

yan ranon mein shahzade ne ghore ko dabaya

hasti ko jalata tha faqat nur ka shola

tha jalwa numachar taraf tur ka shola

abr-e-siyah fauj ka aisa hua tughyan

jo chand hasin ibn-e-ali ka hua pinhan

maidan mein utha tha ghubar-e-sam-e-aspan

tarik hua dida-e-khurshid-e-darakhshan

jati thi chali jan-e-adu chhor ke tan ko

akbar ne siya sozan-e-mizhgan se kafan ko

neze se kahin zakhm lagata kahin shamshir

bini kahin abru ki kahin chashm ki taswir

tha baske tamashai wo naubada shabbir

khurshid ki ainak ko dhare tha falak-e-pir

char aina yun tor ke neza wo idhar jae

jis tarah ke ainak se nigah saf guzar jae

tha ab-e-dam tegh se tufan ka asbab

thi mauj-e-fana sar se guzarta tha para ab

dariya tha wo lashkar to har ik haqlahu tha girdab

aaza-e-burida sifat mahi-e-be ab

ab-e-dam khanjar pe alam daron ke dam the

jab tegh alam ki to alam saf qalam the

yun miyan ke darmiyan se bahar hui talwar

jun phut ke bahar nikal ae badan-e-khar

ik qatra-e-ab us ko jo kahiye hai sazawa

atish magar is ab se hoti thi numudar

tha sarwwo neza pe hua dar badon ko

wo sarw girata tha magar sarwqadon ko

shamshir jo thi rang mein almas ki timsal

marjan ki thi shakh ke bas khun se hui lal

tiron ke lainon ke tawatar pe chale bhal

manind-e-zira thin sipren hathon mein ghirbal

thi chashm-e-zira posh shujaat ke jobal mein

ik dam mein giraftar hue dam-e-ajal mein

the kasa-e-sar dushmanon ke thokaren khate

wo tukhm shutar murgh ki surat nazar ate

tiron ke uqab apni ye surat hain dikhate

toma jigar lashkar aada ka banate

majruh bas ik tir mein sau sau ka jigar ho

jis tarah ke saudanon mein rishte ka guzar ho

ik an mein lashkar mutafarriq hua sara

ik ja pe thahar kar hua ijma dobara

naara pisar-e-saad ne sardaron ko mara

akbar se karo makr koi jald khudara

zor is mein hain tin aur akela ye jari hai

haidar hai payambar hai hasin ibn-e-ali hai

do shakhs the lashkar mein iraqyun ke mashhur

tha ibn-e-ali ik to ik saleh-e-maghrur

ustad arab the fan neza mein wo maqhor

kuchh mashwara kar karke wo lashkar se hue dur

ik rubaru akbar ki zadokisht par aya

neze ko hilata hua ik pusht par aya

donon se gharaz chalne lage neza khun khwar

gah us ka gahe us ka khare rokte the war

ik barq-e-ulatti thi palatti thi har ik bar

ghora tha diya kal ka banaya hua rahwar

neza wo na tha shola-e-jawwala hua tha

gard-e-mah rukhsar ajab balahu hua tha

kahte the malak jurat akbar ye fida hain

goya ahad wabdar mein mahbub-e-khuda hain

jin kahte the khud aj ali garm wagha hain

do do se to larte hain magar hosh bajahain

huren yahi kahti thin ke zahra jo raza den

kausar ka bhara jam abhi la ke pila den

huron se ye farmati thin khatun-e-qayamat

ik adh ghari aur hai ye pyas ki shiddat

kya howe gi is madar gham dida ki halat

is lal ke lene ko gae shah-e-wilayat

ik dam mein kaleja ye sinan khata hai akbar

huro lab-e-kausar par chala ata hai akbar

yan war kiya pusht pe saleh ne qazara

akbar ne palat kar wahin neza use mara

itne hi palatne ne ghazab kardiya sara

bas sar ke bal aya na raha sans ka yara

wan shah gire bano ko ghash agya ghar mein

ik neze ne surakh kiye tin jigar mein

jab tor kaleje ko gaya pusht mein bhala

tharra gae akbar to utha sine se nala

allah ri jurat wahin neze ko nikala

ghash agya har chand bahut dil ko sambhala

jab chhai ajal is dil-e-mayus ke upar

kis yas se sar rakh diya qarbos ke upar

thin barchhiyan bhi neze bhi talwaren bhi harso

ammama bhi purze hua kat kat gae gesu

kahte the ke ati nahin baba ki kahin bu

ki ghore ne apne se bachane mein tag-o-do

waris to na tha koi ba juz panj tan us ka

jis tarah se chaha kiya tukre badan us ka

shadi se lage char taraf log uchhalne

is shor mein di kuch ki awaz-e-duhul ne

kahte the ke mat dijiyo zakhmi ko nikalne

bas bag pakarli wahin ghore ki ajal ne

pata na kahin rah nikalne ko wahan tha

ghora sifat-e-takhta tabut rawan tha

yan shah ko naga dil akbar ne nida di

kya baithe ho wan bajte hain naqqara-e-shadi

nana ki jo taswir thi aada ne mita di

hazrat ne wahin khak pe dastar garadi

zinib ko sada di ke bahan margae akbar

bhawaj se khabardar safar kar gae akbar

likha hai ke naara wahan shabbir ne mara

jis naare se sab dasht-e-bala hal gaya sara

ghabrata tha yun sher-e-ilahi ka wo pyara

bachcha kahin jun sher ka khota hai qazara

jab karte the ghul ha-e-ali wae ali ka

tha jhum raha arsh-e-janab-e-ahadi ka

kahte the malak shah ko akbar se milade

ya to hamen duniya mein utarne ki raza de

duniya ki raza de hamen aur hukm wagha de

in zalimon ko safha-e-hasti se mita de

yaaqub hai ye dasht hai bit alhazan us ka

han jald mila yusuf-e-gul pairahan us ka

khaliq ki sada ai farishton ko ke jao

marda use farzand kale jake dikhao

nashad ko bichhre hue bete se milao

shabbir agar mane to dukh dard batao

hai us pe musallat kiya is waste gham ko

ye sabr hasin ibn-e-ali bhata hai ham ko

yan muttasil-e-fauj jo pahunche shah zi jah

har ek se kahte the batao mujhe lalla

jis khak pe tum sab ne giraya hai miramah

gum hogaya beta mira roko na miri rah

hai haq ba taraf ab jo mira hal digar hai

duniya mein kisi bap ka akbar sa pisar hai

tum sab ne mira lal hai kis tarah ka mara

sunta hun ke majruh kaleja kiya sara

mujh bap ko dekho ke raha mahw-e-nazara

dil hal gaya jab ya ubta us ne pukara

lo pas ka insan dikhai nahin deta

ab kuchh mujhe ankhon se sujhai nahin deta

sab ghar to mira saf kiya tum ne jafa se

kaise mire dil dar kiye zabh-e-pyase

jis shakhs mein hun rahm ke asar zara se

wo hath mira tham le ab dar ke khuda se

jis rah sidhara wo mujhe rah batado

bas dur se lasha ali akbar ka dukhado

darte ho to ao miri shamshir-o-sipar lo

andesha jo ho dil mein to qaidi mujhe karlo

tum gar dachlo aur mujhe bich mein dharlo

do lal mira mujh ko mire jism se sarlo

sayyad pe karo rahm musalman samajh kar

kya taras bhi ata nahin insan samajh kar

nagah sada dur se ye kan mein ai

kyun qibla-e-hajat bari der lagai

kis waqt mein hazrat ne miri yad bhalai

us ki khabar aman ne bhi pai ke na pai

wo samne mere mulk almut khara hai

jald aiye ab dard kaleje mein bara hai

sun kar ye sada kuchh to hua dil ko sahara

chillae ke hai dhundh raha bap tumhara

ham kya karen beta nahin kuchh jurm hamara

akhir hua jakar ye sar naash guzara

dekha ke hai baitha hua ghora to zamin par

tan khak pe gardan hai dhari khana-e-zain par

chhati pe dhara hath hai aur khun hai ubalta

tham tham ke lahu sans ke ham rah nikalta

munh zard hai jis tarah ke khurshid ho dhalta

mathe pe araq aya hai aur dil hai uchhalta

mushtaq pidar der se har chand hain ankhen

khulti hain kabhi aur kabhi band hain ankhen

be sakhta is dam shah-e-mazlum pukare

lo jan-e-pidar ae hain ham pas tumhare

bola na gaya jab kiye abru se ishare

rakh dijiye naalain ko sine pe hamare

jine ki na duniya ki na kausar ki hawas hai

is waqt mujhe zanue madar ki hawas hai

hazrat ne use god mein pahle to sambhala

phir phul ke manind utha ghore pe dala

akbar ne kaha ah mira zakhm hai ala

shah ne kaha hai nawak-e-dil aur ye nala

is dard ki shiddat mein jo le jaun to kyun kar

jita ho aman tak tumhen pahunchaun to kyun kar

gar dard yahi hai to guzar jaoge akbar

man tak bhi na pahunchoge ke marjao ge akbar

be kis pidar-e-pir ko karjao ge akbar

main bhi wahin jaunga jidhar jaoge akbar

ye akhiri didar use dikhlao to behtar

jite hue man tak jo pahunch jao to behtar

the ba saruryan to hasin ap rawa na

khud bag ko thame hue sultan zamana

kahte the ke ghore qadam ahista barhana

tu zakhm na akbar ke kaleje ka dikhana

farzand ka bano ke badan chur hai ghore

ye mujh ko dikhana use manzur hai ghore

ghora to rawan hota tha har chand ko tham tham

har gam pe bas tutne lagta tha yahan dam

das bis qadam us ne uthae na the paiham

yan hone laga sans kabas aur hi alam

khema raha nazdik to itni hi takan mein

ruh-e-ali akbar gai gulzar-e-janan mein

paon ne yahan dekh liya shah ka saya

chillai ke sahab kaho yusuf mira aya

tum ne use kis waste ghore pe lutaya

qarbos pe rukhsar hai kyun us ne jhukaya

wo dur wo taqat wo tawanai kahan hai

latkae hue hath mira sher jawan hai

murda nazar aya use jab muttasil ae

murde hi se milne ke liye hath barhae

namus-e-mohammad ne ajab shor machae

mil jal ke wo hathon pe utha kheme mein lae

is sher ke murde pe bhi ik rob bara tha

bas khun mein duba hua ik chand para tha

bano ne gharaz baith ke zanu pe liya sar

gesu ko utha chand sa mukhra kiya bahar

chillai ke do sahabo parsa mujhe akar

nauha mein parhun tum kaho hai hai ali akbar

barbad yahan bano ki daulat gai logo

atthara baras ki miri mehnat gai logo

ikburki wo danaiyan ab lagti hain jun tir

jab shah se raza jang ki lae the ba tadbir

manzur ho aman se bhi bakhshaiye ab sher

karti thi zaban sharm se luknat dam-e-taqrir

main ne kaha ham jan ko waren ali akbar

sadqe huin ye dudh ki dharen ali akbar

phir bano ne is zakhm se hath apna uthaya

munh apna jhuka kar use ankhon se lagaya

bas ulfat madar ne jo ik josh sa khaya

akbar ka dil is zakhm ke raste nikal aya

sab dekhte the fart-e-mohabbat ke chalan se

tader wo lipta raha madar ke dahan se

aur a sada pani na hath aya zara sa

aman mein pyasa raha pyasa raha pyasa

ab chhor do daman mira ai haq ki shanasa

ab marne ko jata hai mohammad ka nawasa

lashe pe mire ap ne wo bain kiya hai

is ruh par arman ko be chain kya

ye sunte hi ghash hogai bano jigar afgar

sab gard khare hogae ghabra ke bas ik bar

fursat jo mili itni to badida-e-khunbar

lashe ko utha le gae bahar shah-e-abrar

baqi ali asghar ke siwa koi nahin hai

ab khanjar be dad-o-gulwe shah den hai

jis sal kahe wasf ye ham shakl nabi ke

sun bara se unchas the hijri nabwi ke

age to ye andaza sukhan the na kisi ke

ab sab ye muqallid hue is tarz-e-nawi ke

das mein kahun so main kahun ye wird hai mera

jo jo kahe is tarz mein shagird hai mera

han kilk bas ab age nahin taqat tahrir

ho aur ziyada tiri tahrir mein tasir

kahta hai zamir ab ke barae shah-e-dil gir

mahbub ali jan-e-nabi hazrat-e-shabbir

is marsiye ka bas ye khuda mujh ko sala de

akbar ka tasadduq miri aulad jalade