کس منہ سے کروں میں تن عریاں کی شکایت

کس منہ سے کروں میں تن عریاں کی شکایت

داماں کی شکایت نہ گریباں کی شکایت

کیسا ہی کھٹکتا رہے دل میں مرے پیکاں

مجھ سے تو نہ ہوگی کبھی مہماں کی شکایت

اتنا بھی تغافل نہیں اچھا کہیں تم کو

کرنی نہ پڑے شورش پنہاں کی شکایت

اللہ رکھے مرے تصور کو سلامت

تجھ کو تو نہیں ہے شب ہجراں کی شکایت

ہوں لنگ مگر واقف آداب جنوں ہوں

میں کفر سمجھتا ہوں بیاباں کی شکایت

کہتی ہے تری چشم کی گردش مرے ہوتے

کوئی نہ کرے گردش دوراں کی شکایت

جاتے تو ہو کعبے کو خدا کے لئے مائلؔ

کرنا نہ کسی دشمن ایماں کی شکایت

kis munh se karun main tan uryan ki shikayat

daman ki shikayat na gareban ki shikayat

kaisa hi khatakta rahe dil mein mire paikan

mujh se to na hogi kabhi mehman ki shikayat

itna bhi taghaful nahin achchha kahin tum ko

karni na pare shorish-e-pinhan ki shikayat

allah rakhe mire tasawwur ko salamat

tujh ko to nahin hai shab-e-hijran ki shikayat

hun lang magar waqif-e-adab-e-junun hun

main kufr samajhta hun bayaban ki shikayat

kahti hai tiri chashm ki gardish mire hote

koi na kare gardish-e-dauran ki shikayat

jate to ho kaabe ko khuda ke liye mail

karna na kisi dushman iman ki shikayat