کس ناز سے واہ ہم کو مارا

کس ناز سے واہ ہم کو مارا

کی ترچھی نگاہ ہم کو مارا

سو پیچ میں لا کے آخر کار

اے زلف سیاہ ہم کو مارا

خواہندہ ترے تھے اے پری ہم

کیوں خواہ نہ خواہ ہم کو مارا

کعبے کو جو ہم چلے بتوں نے

کہہ کر گمراہ ہم کو مارا

شکوہ ہمیں کچھ نہیں فلک سے

تو نے اے ماہ ہم کو مارا

چاہ زقن صنم دکھا کر

تو نے اے چاہ ہم کو مارا

ایسے ہیں ضعیف مر گئے ہم

جس نے پر کاہ ہم کو مارا

اس کی زلف دراز نے شب

قصۂ کوتاہ ہم کو مارا

شمشیر نگہ سے اس نے بے موت

خالق ہے گواہ ہم کو مارا

بوسہ کی طلب میں اس نے گویاؔ

نا کردہ گناہ ہم کو مارا

kis naz se wah ham ko mara

ki tirchhi nigah ham ko mara

so pech mein la ke akhir kar

ai zulf-e-siyah ham ko mara

khwahnda tire the ai pari ham

kyun khwah na khwah ham ko mara

kaabe ko jo ham chale buton ne

kah kar gumrah ham ko mara

shikwa hamen kuchh nahin falak se

tu ne ai mah ham ko mara

chah-e-zaqan sanam dikha kar

tu ne ai chah ham ko mara

aise hain zaif mar gae ham

jis ne par kah ham ko mara

us ki zulf-e-daraz ne shab

qissa-e-kotah ham ko mara

shamshir-e-nigah se us ne be maut

khaliq hai gawah ham ko mara

bosa ki talab mein us ne goya

na karda gunah ham ko mara