بیٹھے ہوئے ہیں ہم خود آنکھوں میں دھول ڈالے

بیٹھے ہوئے ہیں ہم خود آنکھوں میں دھول ڈالے

اے روئے یار تو نے پردے فضول ڈالے

جھگڑا ہی تم چکا دو جب تیغ کھینچ لی ہے

آفت میں پھر نہ مجھ کو جان ملول ڈالے

صورت تو ایک ہی تھی دو گھر ہوئے تو کیا ہے

دیر و حرم کی بابت جھگڑے فضول ڈالے

تربت سے کوئی پوچھے نیرنگئ زمانہ

بعضوں نے خاک ڈالی بعضوں نے پھول ڈالے

کہتے ہیں جس کو جلوہ وہ بھی کہیں رکا ہے

آڑیں فضول کی ہیں پردے فضول ڈالے

صدقے دل و جگر کو مژگاں پہ کر چکا ہوں

میں نے تو اپنے ہاتھوں کانٹوں پہ پھول ڈالے

کیسے حساب جوڑوں اعمال معصیت کا

جب اس کی شان رحمت گنتی میں بھول ڈالے

مضطرؔ دلوں کے اندر رکھنے کے تھے یہ کافر

دوزخ میں کیوں خدا نے جنت کے پھول ڈالے

baithe hue hain ham khud ankhon mein dhul dale

ai ru-e-yar tu ne parde fuzul dale

jhagra hi tum chuka do jab tegh khinch li hai

afat mein phir na mujh ko jan-e-malul dale

surat to ek hi thi do ghar hue to kya hai

dair-o-haram ki babat jhagre fuzul dale

turbat se koi puchhe nairangi-e-zamana

baazon ne khak dali baazon ne phul dale

kahte hain jis ko jalwa wo bhi kahin ruka hai

aren fuzul ki hain parde fuzul dale

sadqe dil-o-jigar ko mizhgan pe kar chuka hun

main ne to apne hathon kanton pe phul dale

kaise hisab jorun aamal maasiyat ka

jab us ki shan rahmat ginti mein bhul dale

muztar dilon ke andar rakhne ke the ye kafir

dozakh mein kyun khuda ne jannat ke phul dale