کبھی لطف زبان خوش بیاں تھے

کبھی لطف زبان خوش بیاں تھے

زمین شعر کے ہم آسماں تھے

لگا ٹھوکر نہ پائے ناز سے تو

کبھی تاج سر ہندوستاں تھے

زمیں پر چرخ دیتا ہے عبث تو

کبھی پیر فلک ہم بھی جواں تھے

زر گل بن گیا نالہ ہمارا

چمن میں بھی ہمیں آتش فشاں تھے

مکیں تھی روح چھوڑا جسم جس دم

کرائے کے یہ سب قصر و مکاں تھے

وہی جنگل ہے اب پر اس سے آگے

چمن تھے گل تھے ہم تھے باغباں تھے

نہیں اب ضبط باقی ناتواں ہوں

مرے آنسو نہایت رازداں تھے

مرے نالوں سے پہنچا قافلہ سب

جرس بے کار مشغول فغاں تھے

جگایا ناتواں بینوں نے ان کو

عبث وہ مائل خواب گراں تھے

دبے زیر زمیں اے چرخ مہ رو

یہاں دو دن کے یہ سب مہماں تھے

عجب موسم میں کٹتی تھی جوانی

چمن تھا اور لطف قصہ خواں تھے

کہاں مجنوں کہاں فرہادؔ و وامقؔ

ہماری موت کے سب نوحہ خواں تھے

سواد لکھنؤ چھوڑا الم میں

یہ اخترؔ بھی غضب کے خوش بیاں تھے

kabhi lutf-e-zaban-e-khush bayan the

zamin-e-sher ke ham asman the

laga thokar na pae naz se to

kabhi taj-e-sar-e-hindostan the

zamin par charkh deta hai abas to

kabhi pir-e-falak ham bhi jawan the

zar-e-gul ban gaya nala hamara

chaman mein bhi hamen atish fishan the

makin thi ruh chhora jism jis dam

karae ke ye sab qasr-o-makan the

wahi jangal hai ab par is se age

chaman the gul the ham the baghban the

nahin ab zabt baqi natawan hun

mire ansu nihayat razdan the

mire nalon se pahuncha qafila sab

jaras be kar mashghul-e-fughan the

jagaya natawan bainon ne un ko

abas wo mail khwab-e-giran the

dabe zer-e-zamin ai charkh-e-mah ru

yahan do din ke ye sab mehman the

ajab mausam mein katti thi jawani

chaman tha aur lutf-e-qissa khwan the

kahan majnun kahan farhad-o-wamiq

hamari maut ke sab nauha khwan the

sawad-e-lakhnau chhora alam mein

ye akhtar bhi ghazab ke khush bayan the