کبھی ادھر جو سگ کوئے یار آ نکلا

کبھی ادھر جو سگ کوئے یار آ نکلا

گماں ہوا مرے ویرانہ میں ہما نکلا

رخ اس کا دیکھ ہوا زرد نیر اعظم

سنہرے برج سے جس دم وہ مہ لقا نکلا

وہ سن کے پاک محبت کا نام کہتے ہیں

ہماری جان کو لو یہ بھی پارسا نکلا

ہمارے پاؤں پڑے آ کے آبلے ہر گام

کبھی جو دشت جنوں میں برہنہ پا نکلا

مہ صیام میں آیا جو وہ ہلال ابرو

گماں ہوا یہ مجھے چاند عید کا نکلا

جہاں کی سیر تو کی تو نے لیکن اے شہ حسن

کبھی فقیر کے تکیے پہ تو نہ آ نکلا

نہ نکلا وہم کے مارے وہ گھر سے بھی سیاحؔ

گلی سے یار کے تابوت جب مرا نکلا

kabhi idhar jo sag-e-ku-e-yar a nikla

guman hua mire wirana mein huma nikla

rukh us ka dekh hua zard nayar-e-aazam

sunahre burj se jis dam wo mah liqa nikla

wo sun ke pak mohabbat ka nam kahte hain

hamari jan ko lo ye bhi parsa nikla

hamare paon pare a ke able har gam

kabhi jo dasht-e-junun mein barahna pa nikla

mah sayyam mein aya jo wo hilal-e-abru

guman hua ye mujhe chand eid ka nikla

jahan ki sair to ki tu ne lekin ai shah-e-husn

kabhi faqir ke takiye pe to na a nikla

na nikla wahm ke mare wo ghar se bhi sayyah

gali se yar ke tabut jab mira nikla