کبھی خوں ہوتی ہوئے اور کبھی جلتے دیکھا
سید یوسف علی خاں ناظمکبھی خوں ہوتی ہوئے اور کبھی جلتے دیکھا
دل کو ہر بار نیا رنگ بدلتے دیکھا
جب یہ چاہا کہ لکھیں وصف صفائے رخ یار
صفحہ پر پائے قلم ہم نے پھسلتے دیکھا
مے میں یہ بات کہاں جو ترے دیدے میں ہے
جس کو دیکھا کہ گرا پھر نہ سنبھلتے دیکھا
اف رے سوز دل عاشق کہ لحد پر اس کے
سنگ مرمر صفت برف پگھلتے دیکھا
دل کے لینے میں یہ قدرت اسے اللہ نہ دے
جس کو مٹی کے کھلونے پہ مچلتے دیکھا
دل کا کیا رنگ ہے تم پھر بھی نہ سمجھے افسوس
چشمۂ چشم سے خوناب ابلتے دیکھا
ہے یہ ساقی کی کرامت کہ نہیں جام کے پاؤں
اور پھر بزم میں سب نے اسے چلتے دیکھا
واعظ و شیخ سبھی خوب ہیں کیا بتلاؤں
میں نے میخانے سے کس کس کو نکلتے دیکھا
پردہ کیوں کرتا ہے ناظمؔ ترے گھر آئے تھے
رات کو ہم نے انہیں بھیس بدلتے دیکھا
kabhi khun hoti hue aur kabhi jalte dekha
dil ko har bar naya rang badalte dekha
jab ye chaha ke likhen wasf-e-safa-e-rukh-e-yar
safha par pae qalam ham ne phisalte dekha
mai mein ye bat kahan jo tire dide mein hai
jis ko dekha ke gira phir na sambhalte dekha
uf re soz-e-dil-e-ashiq ke lahad par us ke
sang-e-marmar sifat barf pighalte dekha
dil ke lene mein ye qudrat use allah na de
jis ko mitti ke khilaune pe machalte dekha
dil ka kya rang hai tum phir bhi na samjhe afsos
chashma-e-chashm se khunab ubalte dekha
hai ye saqi ki karamat ke nahin jam ke paon
aur phir bazm mein sab ne use chalte dekha
waiz-o-shaikh sabhi khub hain kya batlaun
main ne maikhane se kis kis ko nikalte dekha
parda kyun karta hai nazim tire ghar ae the
rat ko ham ne unhen bhes badalte dekha