کافر ہوئے صنم ہم دیں دار تیری خاطر

کافر ہوئے صنم ہم دیں دار تیری خاطر

تسبیح توڑ باندھا زنار تیری خاطر

گل سینہ چاک بلبل نالاں چمن میں دیکھی

آنکھوں کے دکھ سے نرگس بیمار تیری خاطر

ابرو کی تو اشارت جس کی طرف کرے تھا

چلتی تھی مجھ میں اس میں تلوار تیری خاطر

میں جھوٹ سچ بھی یک دم آنسو نہ ان کے پونچھے

جو چشم روز و شب ہیں خوں بار تیری خاطر

سب آشناؤں سے ہم بیگانہ ہو رہے تھے

اب زندگی ہے اپنی دشوار تیری خاطر

مسجد میں میکدے میں کیا کیفی اور صوفی

بے ہوش تیری خاطر ہشیار تیری خاطر

جو راہ عاشقی میں تھی پستی و بلندی

وہ ہم نے کی سراسر ہموار تیری خاطر

پتھرا گئی ہیں آنکھیں انجم کی طرح ہر شب

بیدار رہتے رہتے اے یار تیری خاطر

اس ابر میں چمن نے کیا کیا کیا ہے ساقی

اسباب مے کشی کا تیار تیری خاطر

ہر غنچہ ہے گلابی ہر گل ہے ساغر مے

مے خانہ ہو رہا ہے گلزار تیری خاطر

آگے تو کوچہ گردی شیوہ نہ تھا محبؔ کا

کی اب شروع اس نے ناچار تیری خاطر

kafir hue sanam ham den dar teri khatir

tasbih tor bandha zunnar teri khatir

gul sina chak-e-bulbul nalan chaman mein dekhi

ankhon ke dukh se nargis bimar teri khatir

abru ki to isharat jis ki taraf kare tha

chalti thi mujh mein is mein talwar teri khatir

main jhut sach bhi yak dam ansu na un ke ponchhe

jo chashm-e-roz-o-shab hain khun bar teri khatir

sab ashnaon se ham begana ho rahe the

ab zindagi hai apni dushwar teri khatir

masjid mein maikade mein kya kaifi aur sufi

be hosh teri khatir hushyar teri khatir

jo rah-e-ashiqi mein thi pasti-o-bulandi

wo ham ne ki sarasar hamwar teri khatir

pathra gai hain ankhen anjum ki tarah har shab

bedar rahte rahte ai yar teri khatir

is abr mein chaman ne kya kya kiya hai saqi

asbab-e-mai kashi ka tayyar teri khatir

har ghuncha hai gulabi har gul hai saghar-e-mai

mai khana ho raha hai gulzar teri khatir

age to kucha gardi shewa na tha muhib ka

ki ab shuru us ne nachar teri khatir