ڈھونڈ ہم ان کو پریشان بنے بیٹھے ہیں

ڈھونڈ ہم ان کو پریشان بنے بیٹھے ہیں

وہ تو پردہ لئے انسان بنے بیٹھے ہیں

ذوق حاصل انہیں ہوتا ہے ہر یک صورت سے

رنگ و بے رنگی سے ہر آن بنے بیٹھے ہیں

چھوڑ مسجد کو گئے دیر میں پوجا کرنے

تھے مسلمان وہ رہبان بنے بیٹھے ہیں

بات یہ ہے کہ ہیولیٰ سے ہے صورت پیدا

ہر یک اجسام میں رحمان بنے بیٹھے ہیں

تازہ ہر آن دکھاتے ہیں وہ جلوہ اپنا

ہر تعین کے لئے شان بنے بیٹھے ہیں

ہیں مسیحا کہیں بیمار کہیں درد کہیں

ہر طرح سے وہی درمان بنے بیٹھے ہیں

وہی ہوتا ہے ہر یک کام جو وہ چاہتے ہیں

دیتے حسرت بھی ہیں ارمان بنے بیٹھے ہیں

کفر و اسلام کے پردے سے ہیں ہر حال میں خوش

واجب آئینہ سے امکان بنے بیٹھے ہیں

سچ تو یہ ہے کہ حقیقت جو ہے ان کی معلوم

جانتے جو ہیں وہ انجان بنے بیٹھے ہیں

جملہ ادوار و شیونات سے جلوہ کرتے

شان مرکزؔ میں وہ سبحان بنے بیٹھے ہیں

dhund ham un ko pareshan bane baithe hain

wo to parda liye insan bane baithe hain

zauq-e-hasil unhen hota hai har yak surat se

rang-o-be rangi se har an bane baithe hain

chhor masjid ko gae der mein puja karne

the musalman wo rahban bane baithe hain

bat ye hai ke hayula se hai surat paida

har yak ajsam mein rahman bane baithe hain

taza har an dikhate hain wo jalwa apna

har taayyun ke liye shan bane baithe hain

hain masiha kahin bimar kahin dard kahin

har tarah se wahi diraman bane baithe hain

wahi hota hai har yak kam jo wo chahte hain

dete hasrat bhi hain arman bane baithe hain

kufr-o-islam ke parde se hain har hal mein khush

wajib aina se imkan bane baithe hain

sach to ye hai ke haqiqat jo hai un ki maalum

jante jo hain wo anjan bane baithe hain

jumla adwar-o-shewanat se jalwa karte

shan markaz mein wo subhan bane baithe hain