Arooz is now on the App Store, for iPhone and iPad. Download →

All poetry

بے اجل کام نہ اپنا کسی عنواں نکلا

Fani Badayuni (1879–1941)

بے اجل کام نہ اپنا کسی عنواں نکلا

دم تو نکلا مگر آزردۂ احساں نکلا

آ گئی ہے ترے بیمار کے منہ پر رونق

جان کیا جسم سے نکلی کوئی ارماں نکلا

دل آگاہ سے کیا کیا ہمیں امیدیں تھیں

وہ بھی قسمت سے چراغ تہ داماں نکلا

دل بھی تھا منہ سے بس اک آہ نکل جانے تک

آگ سینے میں لگا کر غم پنہاں نکلا

چارہ گر ناصح مشفق دل بے صبر و قرار

جو ملا عشق میں غم خوار وہ ناداں نکلا

شکوہ منظور نہیں تذکرۂ عشق نہ چھیڑ

کہ وہ درپردہ مرا حال پریشاں نکلا

بجلیاں شاخ نشیمن پہ بچھی جاتی ہے

کیا نشیمن سے کوئی سوختہ ساماں نکلا

اب جنوں سے بھی توقع نہیں آزادی کی

چاک داماں بھی باندازۂ داماں نکلا

ہائے وہ وعدۂ فردا کی مدد وقت اخیر

ہائے وہ مطلب دشوار کہ آساں نکلا

شوق بیتاب کا انجام تحیر پایا

دل سمجھتے تھے جسے دیدۂ حیراں نکلا

اس نے کیا سینۂ صد چاک سے کھینچا فانیؔ

دل میں کہتا ہوں وہ کہتا ہے کہ پیکاں نکلا