آبلے پاؤں کے کیا تو نے ہمارے توڑے

آبلے پاؤں کے کیا تو نے ہمارے توڑے

خار صحرائے جنوں عرش کے تارے توڑے

ذقن و رخ میں نہ جاسوسوں سے باقی رکھی

ثمر گل چمن حسن کے سارے توڑے

سلسلہ اپنی گرفتاری کا کب قطع ہوا

پہنی پازیب انہوں نے جو اتارے توڑے

مست مجھ سا بھی کوئی نشہ کا ہوگا نہ حریص

پی کے مے جام کے دانتوں سے کنارے توڑے

شربت وصل ہے تنقید کی خاطر موجود

تپ ہجر آ کے بدن کو نہ ہمارے توڑے

ختم دزدیدہ نگہ پر ہے تری طراری

دل نہیں توڑے احبا کے پٹارے توڑے

آ گیا وہ شجر حسن نظر جب ہم کو

بوسہ لے کر لب شیریں کے چھوارے توڑے

عشق بے درد سے کرنے کو کہا تھا کس نے

سر کو ٹکرا کے نہ دل درد کے مارے توڑے

کنج عزلت میں بٹھایا ہے خدا نے آتشؔ

اب جو تم یاں سے ہلے پاؤں تمہارے توڑے

able paon ke kya tu ne hamare tore

khar-e-sahra-e-junun arsh ke tare tore

zaqan-o-rukh mein na jasuson se baqi rakhi

samar gul-e-chaman husn ke sare tore

silsila apni giraftari ka kab qata hua

pahni pazeb unhon ne jo utare tore

mast mujh sa bhi koi nasha ka hoga na haris

pi ke mai jam ke danton se kinare tore

sharbat-e-wasl hai tanqid ki khatir maujud

tap-e-hijr a ke badan ko na hamare tore

khatm duzdida nigah par hai tiri tarrari

dil nahin tore ahba ke pitare tore

a gaya wo shajar-e-husn-e-nazar jab ham ko

bosa le kar lab-e-shirin ke chhuare tore

ishq-e-be dard se karne ko kaha tha kis ne

sar ko takra ke na dil dard ke mare tore

kunj-e-uzlat mein bithaya hai khuda ne atish

ab jo tum yan se hile paon tumhare tore