چشم خونبار میں کیوں لخت جگر جمع کریں

چشم خونبار میں کیوں لخت جگر جمع کریں

غنچۂ گل کی طرح کا ہے کو زر جمع کریں

قتل کے بعد ہوا حکم کہ لاشیں اٹھ جائیں

قید تفریق سے مقتولوں کے سر جمع کریں

یار نے خط و کبوتر کے کئے ہیں ٹکڑے

پرزے کاغذ کے کریں جمع کہ پر جمع کریں

فکر میں گیسو و رخسار کے دل کی خاطر

شام ہوتی ہے پریشاں جو سحر جمع کریں

ہم رہے دہر میں جب تک تو رہے پا بہ رکاب

پر نہ یہ ہو سکا اسباب سفر جمع کریں

دونوں عالم سے نہ کیوں بند وہ آنکھیں رکھیں

تیرے نظارے کے خاطر جو نظر جمع کریں

یک قلم پنچ صد و چار ہوں دیواں میں غزل

ہم کلام اپنا وقارؔ آج اگر جمع کریں

chashm-e-khunbar mein kyun lakht-e-jigar jama karen

ghuncha-e-gul ki tarah ka hai ko zar jama karen

qatl ke baad hua hukm ke lashen uth jaen

qaid-e-tafriq se maqtulon ke sar jama karen

yar ne khat-o-kabutar ke kiye hain tukre

purze kaghaz ke karen jama ke par jama karen

fikr mein gesu-o-rukhsar ke dil ki khatir

sham hoti hai pareshan jo sahar jama karen

ham rahe dahr mein jab tak to rahe pa ba rikab

par na ye ho saka asbab safar jama karen

donon alam se na kyun band wo ankhen rakhen

tere nazzare ke khatir jo nazar jama karen

yak qalam panch sad-o-char hun diwan mein ghazal

ham kalam apna waqar aj agar jama karen