چلتا ہے آفتاب کا دور اس قمر کے ساتھ — نواب امراوبہادر دلیر

Arooz is now on the App Store, for iPhone and iPad. Download →

نواب امراوبہادر دلیر

چلتا ہے آفتاب کا دور اس قمر کے ساتھ

ہم عیب بھی جو کرتے ہیں تو اک ہنر کے ساتھ

کیوں کر کسی کے روز جزا چھپ سکیں گے جرم

خفیہ نویس دودو ہیں ہر اک بشر کے ساتھ

رکھ لینا یا خدا مری تر دامنی کی شرم

بادل برستے آئیں دعا کے اثر کے ساتھ

ان روزوں خانداں کو کوئی پوچھتا نہیں

عزت ہے آدمی کی بس اب سیم و زر کے ساتھ

ہاتھوں میں چاہتے ہو حنا کا جو شوخ رنگ

مہندی کو پیس لو مرے زخم جگر کے ساتھ

باقی خمار رات کا اب تک ہے ساقیا

گردش میں جام بھی رہے دوران سر کے ساتھ

فضل خدا کا دیکھنا واعظ کہ روز حشر

جنت میں ہم بھی جائیں گے خیر البشر کے ساتھ

خط دے کے نامہ بر کو یہ کہتا ہے شوق دل

اچھا تو ہے کہ خود بھی چلوں نامہ بر کے ساتھ

بچنا دل و جگر کا بتوں سے محال ہے

تیر مژہ بھی چلتے ہیں تیغ نظر کے ساتھ

افسوس اب کسی کا کوئی قدرداں نہیں

جوہر شناس اٹھ گئے اہل ہنر کے ساتھ

کرتے نہ ہم کسی کی اطاعت کبھی دلیرؔ

معشوق ہم کو ملتے اگر زور و زر کے ساتھ