چمن میں گل نے جو کل دعوی جمال کیا

چمن میں گل نے جو کل دعوی جمال کیا

جمال یار نے منہ اس کا خوب لال کیا

فلک نے آہ تری رہ میں ہم کو پیدا کر

برنگ سبزۂ نورستہ پائمال کیا

رہی تھی دم کی کشاکش گلے میں کچھ باقی

سو اس کی تیغ نے جھگڑا ہی انفصال کیا

مری اب آنکھیں نہیں کھلتیں ضعف سے ہمدم

نہ کہہ کہ نیند میں ہے تو یہ کیا خیال کیا

بہار رفتہ پھر آئی ترے تماشے کو

چمن کو یمن قدم نے ترے نہال کیا

جواب نامہ سیاہی کا اپنی ہے وہ زلف

کسو نے حشر کو ہم سے اگر سوال کیا

لگا نہ دل کو کہیں کیا سنا نہیں تو نے

جو کچھ کہ میرؔ کا اس عاشقی نے حال کیا

chaman mein gul ne jo kal daawa-e-jamal kiya

jamal-e-yar ne munh us ka khub lal kiya

falak ne ah tiri rah mein ham ko paida kar

barang-e-sabza-e-naurusta paimal kiya

rahi thi dam ki kashakash gale mein kuchh baqi

so us ki tegh ne jhagra hi infisal kiya

miri ab ankhen nahin khultin zof se hamdam

na kah ke nind mein hai to ye kya khayal kiya

bahar rafta phir ai tire tamashe ko

chaman ko yaman-e-qadam ne tire nihal kiya

jawab-e-nama siyahi ka apni hai wo zulf

kisu ne hashr ko ham se agar sawal kiya

laga na dil ko kahen kya suna nahin tu ne

jo kuchh ke mir ka is ashiqi ne hal kiya