چمن میں مجھ سے دیوانے کے لے جانے سے کیا حاصل

چمن میں مجھ سے دیوانے کے لے جانے سے کیا حاصل

دکھا کر گل جنوں کو شور میں لانے سے کیا حاصل

جنہیں بالوں کی پھانسی دی وہ ہرگز جی نہیں سکتے

جو زلفوں میں پھنسایا اس کے غم کھانے سے کیا حاصل

ہمارے درد کی دارو اگر کچھ ہے تو دارو ہے

یہ سب کچھ سن کے ساقی بات پی جانے سے کیا حاصل

نگہ تیرے ہی جیسے عکس آئینے کا چینی میں

یہ سب باتیں سمجھ کر جان شرمانے سے کیا حاصل

نہ وہ دل ہے نہ وہ شور جنوں ہے سیر گل مت کر

رفیقوں بن یقیںؔ گلزار میں جانے سے کیا حاصل

chaman mein mujh se diwane ke le jane se kya hasil

dikha kar gul junun ko shor mein lane se kya hasil

jinhen balon ki phansi di wo hargiz ji nahin sakte

jo zulfon mein phansaya us ke gham khane se kya hasil

hamare dard ki daru agar kuchh hai to daru hai

ye sab kuchh sun ke saqi bat pi jane se kya hasil

nigah tere hi jaise aks aine ka chini mein

ye sab baten samajh kar jan sharmane se kya hasil

na wo dil hai na wo shor-e-junun hai sair-e-gul mat kar

rafiqon ban yaqin gulzar mein jane se kya hasil