بیٹھے تو پاس ہیں پر آنکھ اٹھا سکتے نہیں

بیٹھے تو پاس ہیں پر آنکھ اٹھا سکتے نہیں

جی لگا ہے پہ ابھی ہاتھ لگا سکتے نہیں

دور سے دیکھ وہ لب کاٹتے ہیں اپنے ہونٹھ

ہے ابھی پاس ادب ہونٹھ ہلا سکتے نہیں

تکتے ہیں اس قد و رخسار کو حسرت سے اور آہ

بھینچ کر خوب سا چھاتی سے لگا سکتے نہیں

دل تو ان پاؤں پہ لوٹے ہے مرا وقت خرام

شب کو دزدی سے بھی پر ان کو دبا سکتے نہیں

چور سے رات کھڑے رہتے ہیں اس در سے لگے

پر جو مطلوب ہے وہ جنس چرا سکتے نہیں

ریجھتے ان کی اداؤں پہ ہیں کیا کیا لیکن

مارے اندیشے کے گردن بھی ہلا سکتے نہیں

دیکھ رہتے ہیں وہ آئینۂ زانو اس کا

پر کسی شکل سے زانو کو بھڑا سکتے نہیں

قاعدے کیا ہمیں معلوم نہیں الفت کے

بے کم و کاست مگر ان کو پڑھا سکتے نہیں

چپکے تک رہتے ہیں رنگ اس کا بھبوکا سا ہم

آہ پر دل کی لگی اپنی بجھا سکتے نہیں

کیا غضب ہے کہ وہی بولے تو بولے از خود

ہم انہیں کیوں کہ بلاویں کہ بلا سکتے نہیں

گرچہ ہم خانہ ہیں جرأتؔ پہ ہمارے ایسے

بخت سوئے کہ کہیں ساتھ سلا سکتے نہیں

baithe to pas hain par ankh utha sakte nahin

ji laga hai pe abhi hath laga sakte nahin

dur se dekh wo lab katte hain apne honth

hai abhi pas-e-adab honth hila sakte nahin

takte hain is qad-o-rukhsar ko hasrat se aur ah

bhinch kar khub sa chhati se laga sakte nahin

dil to un paon pe laute hai mira waqt-e-khiram

shab ko duzdi se bhi par un ko daba sakte nahin

chur se rat khare rahte hain us dar se lage

par jo matlub hai wo jins-e-chura sakte nahin

rijhte un ki adaon pe hain kya kya lekin

mare andeshe ke gardan bhi hila sakte nahin

dekh rahte hain wo aina-e-zanu us ka

par kisi shakl se zanu ko bhira sakte nahin

qaide kya hamen maalum nahin ulfat ke

be kam-o-kasat magar un ko parha sakte nahin

chupke tak rahte hain rang us ka bhabuka sa ham

ah par dil ki lagi apni bujha sakte nahin

kya ghazab hai ke wahi bole to bole az khud

ham unhen kyun ke bulawen ke bala sakte nahin

garche ham khana hain jurat pe hamare aise

bakht soe ke kahin sath sula sakte nahin