چمن میں شب کو جو وہ شوخ بے نقاب آیا

چمن میں شب کو جو وہ شوخ بے نقاب آیا

یقین ہو گیا شبنم کو آفتاب آیا

ان انکھڑیوں میں اگر نشۂ شراب آیا

سلام جھک کے کروں گا جو پھر حجاب آیا

کسی کے محرم آب رواں کی یاد آئی

حباب کے جو برابر کبھی حباب آیا

شب فراق میں مجھ کو سلانے آیا تھا

جگایا میں نے جو افسانہ گو کو خواب آیا

عدم میں ہستی سے جا کر یہی کہوں گا میں

ہزار حسرت زندہ کو گاڑ داب آیا

چکور حسن مہ چار دہ کو بھول گیا

مراد پر جو ترا عالم شباب آیا

محبت مے و معشوق ترک کر آتشؔ

سفید بال ہوئے موسم خضاب آیا

chaman mein shab ko jo wo shokh be naqab aya

yaqin ho gaya shabnam ko aftab aya

in ankhriyon mein agar nasha-e-sharab aya

salam jhuk ke karunga jo phir hijab aya

kisi ke mahram ab-e-rawan ki yad ai

habab ke jo barabar kabhi habab aya

shab-e-firaq mein mujh ko sulane aya tha

jagaya main ne jo afsana go ko khwab aya

adam mein hasti se ja kar yahi kahunga mein

hazar hasrat zinda ko gar dab aya

chakor husn-e-mah char da ko bhul gaya

murad par jo tira alam-e-shabab aya

mohabbat mai-o-maashuq tark kar atish

safed bal hue mausam-e-khizab aya