چاہئے پرہیز گردش چشم شوخ یار کو

چاہئے پرہیز گردش چشم شوخ یار کو

گھومنے سے جب زیاں ہے مردم بیمار کو

ہوں مریض عشق ہے یہ درد میرا لا دوا

ہوگی صحت کیا مسیحا سے ترے بیمار کو

ناوک بے پر اگر ہے اس کی مژگان دراز

قوس کیوں سمجھے نہ عاشق ابروئے خم دار کو

میری ہی نفرت نے کی الفت رقیبوں سے سوا

وصل کی دولت میسر کیوں نہ ہو اغیار کو

شام غربت ہجر میں تو وصل میں صبح وطن

دیکھتا ہوں اپنے گھر میں سایۂ دیوار کو

کیا قیامت ہے درازیٔ شب یلدائے ہجر

روز محشر پر جو رکھا وعدۂ دیدار کو

ایک درہم کی اسے خواہش تو لاکھوں کی اسے

شکر مفلس سے زیادہ ہے کہیں زردار کو

نقد جاں دے کر زلیخا نے لیا سودائے عشق

حسن یوسف کی جو دیکھا گرمئ بازار کو

ابن آدم سے بھی چھینی عشق ہی نے سلطنت

کر دیا محتاج اسی نے مالک دینار کو

اس زمانے میں بڑی ہوتی ہے زرداروں کی قدر

پوچھتا ہے کون عاجزؔ مفلس نادار کو

chahiye parhez gardish chashm-e-shokh-e-yar ko

ghumne se jab ziyan hai mardum-e-bimar ko

hun mariz-e-ishq hai ye dard mera la dawa

hogi sehhat kya masiha se tire bimar ko

nawak-e-be par agar hai us ki mizhgan-e-daraz

qaus kyun samjhe na ashiq-e-abru-e-kham dar ko

meri hi nafrat ne ki ulfat raqibon se siwa

wasl ki daulat muyassar kyun na ho aghyar ko

sham-e-ghurbat hijr mein to wasl mein subh-e-watan

dekhta hun apne ghar mein saya-e-diwar ko

kya qayamat hai darazi-e-shab yaldae hijr

roz-e-mahshar par jo rakha waada-e-didar ko

ek dirham ki use khwahish to lakhon ki use

shukr muflis se ziyada hai kahin zardar ko

naqd-e-jan de kar zulekha ne liya sauda-e-ishq

husn-e-yusuf ki jo dekha garmi-e-bazar ko

ibn-e-adam se bhi chhini ishq hi ne saltanat

kar diya mohtaj usi ne malik-e-dinar ko

is zamane mein bari hoti hai zardarron ki qadr

puchhta hai kaun ajiz muflis-e-nadar ko