چاک سینے کا بہ انداز جگر ہو کہ نہ ہو — کیفی چریاکوٹی (Kaifi Chirayyakoti)

چاک سینے کا بہ انداز جگر ہو کہ نہ ہو

اور پھر لذت جاں ذوق اثر ہو کہ نہ ہو

تجھ سے اے شمع سر شام ہی رخصت ہو لوں

شب بسر ہو کہ نہ ہو وقت سحر ہو کہ نہ ہو

عمر نظارہ اسی جلوے پہ قرباں کر دوں

پھر کبھی اور مجھے تاب نظر ہو کہ نہ ہو

اب جہاں وہ ہیں مرا ہوش وہیں ہے اے دل

بے خبر میں ہوں انہیں اس کی خبر ہو کہ نہ ہو

اپنے محشر کی سحر بھیج ہی دے اب یا رب

یعنی تنہا ہے مری رات بسر ہو کہ نہ ہو

اس قدر پوچھ تو لو روئے سحر سے کیفیؔ

اس پہ رنگ اثر دیدۂ تر ہو کہ نہ ہو