چراغ زندگی ہوگا فروزاں ہم نہیں ہوں گے

چراغ زندگی ہوگا فروزاں ہم نہیں ہوں گے

چمن میں آئے گی فصل بہاراں ہم نہیں ہوں گے

جوانو اب تمہارے ہاتھ میں تقدیر عالم ہے

تمہیں ہوگے فروغ بزم امکاں ہم نہیں ہوں گے

جئیں گے جو وہ دیکھیں گے بہاریں زلف جاناں کی

سنوارے جائیں گے گیسوئے دوراں ہم نہیں ہوں گے

ہمارے ڈوبنے کے بعد ابھریں گے نئے تارے

جبین دہر پر چھٹکے گی افشاں ہم نہیں ہوں گے

نہ تھا اپنی ہی قسمت میں طلوع مہر کا جلوہ

سحر ہو جائے گی شام غریباں ہم نہیں ہوں گے

اگر ماضی منور تھا کبھی تو ہم نہ تھے حاضر

جو مستقبل کبھی ہوگا درخشاں ہم نہیں ہوں گے

ہمارے دور میں ڈالیں خرد نے الجھنیں لاکھوں

جنوں کی مشکلیں جب ہوں گی آساں ہم نہیں ہوں گے

کہیں ہم کو دکھا دو اک کرن ہی ٹمٹماتی سی

کہ جس دن جگمگائے گا شبستاں ہم نہیں ہوں گے

ہمارے بعد ہی خون شہیداں رنگ لائے گا

یہی سرخی بنے گی زیب عنواں ہم نہیں ہوں گے

charagh-e-zindagi hoga farozan ham nahin honge

chaman mein aegi fasl-e-baharan ham nahin honge

jawano ab tumhare hath mein taqdir-e-alam hai

tumhen hoge farogh-e-bazm-e-imkan ham nahin honge

jiyen ge jo wo dekhenge baharen zulf janan ki

sanware jaenge gesu-e-dauran ham nahin honge

hamare dubne ke baad ubhrenge nae tare

jabin-e-dahr par chhetike gi afshan ham nahin honge

na tha apni hi qismat mein tulu-e-mehr ka jalwa

sahar ho jaegi sham-e-ghariban ham nahin honge

agar mazi munawwar tha kabhi to ham na the hazir

jo mustaqbil kabhi hoga darakhshan ham nahin honge

hamare daur mein dalen khirad ne uljhanen lakhon

junun ki mushkilen jab hongi asan ham nahin honge

kahin ham ko dikha do ik kiran hi timtimati si

ke jis din jagmagaega shabistan ham nahin honge

hamare baad hi khun-e-shahidan rang laega

yahi surkhi banegi zeb unwan ham nahin honge