چاک پر چاک ہوا جوں جوں سلایا ہم نے

چاک پر چاک ہوا جوں جوں سلایا ہم نے

اس گریباں ہی سے اب ہاتھ اٹھایا ہم نے

حسرت لطف عزیزان چمن جی میں رہی

سر پہ دیکھا نہ گل و سرو کا سایہ ہم نے

جی میں تھا عرش پہ جا باندھئے تکیہ لیکن

بسترہ خاک ہی میں اب تو بچھایا ہم نے

بعد یک عمر کہیں تم کو جو تنہا پایا

ڈرتے ڈرتے ہی کچھ احوال سنایا ہم نے

یاں فقط ریختہ ہی کہنے نہ آئے تھے ہم

چار دن یہ بھی تماشا سا دکھایا ہم نے

بارے کل باغ میں جا مرغ چمن سے مل کر

خوبی گل کا مزہ خوب اڑایا ہم نے

تازگی داغ کی ہر شام کو بے ہیچ نہیں

آہ کیا جانے دیا کس کا بجھایا ہم نے

دشت و کہسار میں سر مار کے چندے تجھ بن

قیس و فرہاد کو پھر یاد دلایا ہم نے

بیکلی سے دل بیتاب کی مر گزرے تھے

سو تہ خاک بھی آرام نہ پایا ہم نے

یہ ستم تازہ ہوا اور کہ پائیز میں میرؔ

دل خس و خار سے ناچار لگایا ہم نے

chak par chak hua jun jun sulaya ham ne

is gareban hi se ab hath uthaya ham ne

hasrat-e-lutf azizan-e-chaman ji mein rahi

sar pe dekha na gul-o-sarw ka saya ham ne

ji mein tha arsh pe ja bandhiye takiya lekin

bastrah khak hi mein ab to bichhaya ham ne

baad yak umr kahin tum ko jo tanha paya

darte darte hi kuchh ahwal sunaya ham ne

yan faqat rekhta hi kahne na ae the ham

char din ye bhi tamasha sa dikhaya ham ne

bare kal bagh mein ja murgh-e-chaman se mil kar

khubi gul ka maza khub uraya ham ne

tazgi dagh ki har sham ko be hech nahin

ah kya jane diya kis ka bujhaya ham ne

dasht-o-kohsar mein sar mar ke chande tujh bin

qais-o-farhad ko phir yad dilaya ham ne

bekali se dil-e-betab ki mar guzre the

so tah-e-khak bhi aram na paya ham ne

ye sitam taza hua aur ke paiz mein mir

dil khas-o-khar se nachar lagaya ham ne