چاہئیں مجھ کو نہیں زریں قفس کی پتلیاں

چاہئیں مجھ کو نہیں زریں قفس کی پتلیاں

آشیاں جانوں جو ہوویں خار و خس کی پتلیاں

ہو گئیں بے رنگ جب اگلے برس کی پتلیاں

خون رو کر ہم نے کیں رنگیں قفس کی پتلیاں

ہے یہ فولادی قفس مجھ ناتواں کا کیا کروں

کس طرح توڑوں نہیں ہیں میرے بس کی پتلیاں

کیا خدا کی شان ہے آتی ہے جب فصل بہار

سب ہری ہو جاتی ہیں میرے قفس کی پتلیاں

جب کبھی کنج قفس میں کی ہے میں نے آہ گرم

موم ہو کر بہہ گئی ہیں پیش و پس کی پتلیاں

گھر قفس کو میں سمجھتا ہوں اسیری کو مراد

جانتا ہوں اپنی آہوں کو ہوس کی پتلیاں

پٹریاں میرے قفس کی شاخ گل سے کم نہیں

لوچ یہ دیکھا نہ دیکھیں ایسی رس کی پتلیاں

گونجنے لگتا ہے یہ بھی جب فغاں کرتا ہوں میں

نصب ہیں میرے قفس میں کیا جرس کی پتلیاں

دیکھیے شوق اسیری میں جکڑنے کے لئے

ہو گئیں ریشم کا لچھا سب قفس کی پتلیاں

رو رہی ہے دیکھ کر لیلیٰ جو اس کو اے شرفؔ

پسلیاں مجنوں کی ہیں میرے قفس کی پتلیاں

chahiyen mujh ko nahin zarrin qafas ki putliyan

ashiyan janun jo howen khar-o-khas ki putliyan

ho gain be rang jab agle baras ki putliyan

khun ro kar ham ne kin rangin qafas ki putliyan

hai ye fauladi qafas mujh natawan ka kya karun

kis tarah torun nahin hain mere bas ki putliyan

kya khuda ki shan hai ati hai jab fasl-e-bahar

sab hari ho jati hain mere qafas ki putliyan

jab kabhi kunj-e-qafas mein ki hai main ne ah garm

mom ho kar bah gai hain pesh-o-pas ki putliyan

ghar qafas ko main samajhta hun asiri ko murad

janta hun apni ahon ko hawas ki putliyan

patriyan mere qafas ki shakh-e-gul se kam nahin

loch ye dekha na dekhen aisi ras ki putliyan

gunjne lagta hai ye bhi jab fughan karta hun main

nasb hain mere qafas mein kya jaras ki putliyan

dekhiye shauq-e-asiri mein jakarne ke liye

ho gain resham ka lachchha sab qafas ki putliyan

ro rahi hai dekh kar laila jo us ko ai sharaf

pasliyan majnun ki hain mere qafas ki putliyan