چاک داماں نہ رہا چاک گریباں نہ رہا

چاک داماں نہ رہا چاک گریباں نہ رہا

پھر بھی پوشیدہ مرا حال پریشاں نہ رہا

بزم دشمن نہ کبھی درہم و برہم دیکھی

کیا ترا دور وہ اے گردش دوراں نہ رہا

مجھ کو افسوس کہ وہ اور عدو کے بس میں

اس کو یہ غم کہ مرا اب کوئی پرساں نہ رہا

ہم نے جو بات کہی تھی وہی آخر کو ہوئی

تم نے جو راز چھپایا تھا وہ پنہاں نہ رہا

منفعل ترک وفا نے مجھے برسوں رکھا

چار دن اپنے کیے پر وہ پشیماں نہ رہا

ان کی شوخی بھی ہوئی ہے مری وحشت کا جواب

ہاتھ ڈالا جو گریباں میں گریباں نہ رہا

بن گئی داغ کلیجے کا تمنائے وصال

داغ حسرت کے سوا اب کوئی ارماں نہ رہا

خیر سب قول و قسم جھوٹ سہی خوش رہیے

اب مرے آپ کے وہ عہد وہ پیماں نہ رہا

روکنے کو مجھے غیرت کے سوا اس در پر

کوئی درباں نہ رہا کوئی نگہباں نہ رہا

مٹ گیا شغل جنوں اب وہ کہاں جامہ دری

زور وحشت کا بھی اب دست و گریباں نہ رہا

چار جھڑکی میں ترے در سے الگ ہو بیٹھا

غیر کچھ روز بھی منت کش درباں نہ رہا

وقت کو ہاتھ سے کھو کر کوئی دنیا میں حفیظؔ

عمر بھر میری طرح سر بہ گریباں نہ رہا

chak daman na raha chak-e-gareban na raha

phir bhi poshida mira hal-e-pareshan na raha

bazm-e-dushman na kabhi dirham-o-barham dekhi

kya tira dur wo ai gardish-e-dauran na raha

mujh ko afsos ke wo aur adu ke bas mein

us ko ye gham ke mira ab koi pursan na raha

ham ne jo bat kahi thi wahi akhir ko hui

tum ne jo raz chhupaya tha wo pinhan na raha

munfail tark-e-wafa ne mujhe barson rakha

char din apne kiye par wo pasheman na raha

un ki shokhi bhi hui hai miri wahshat ka jawab

hath dala jo gareban mein gareban na raha

ban gai dagh kaleje ka tamanna-e-wisal

dagh-e-hasrat ke siwa ab koi arman na raha

khair sab qaul-o-qasam jhut sahi khush rahiye

ab mire ap ke wo ahd wo paiman na raha

rokne ko mujhe ghairat ke siwa us dar par

koi darban na raha koi nigahban na raha

mit gaya shaghl-e-junun ab wo kahan jama dari

zor wahshat ka bhi ab dast-o-gareban na raha

char jhirki mein tire dar se alag ho baitha

ghair kuchh roz bhi minnat kash-e-darban na raha

waqt ko hath se kho kar koi duniya mein hafiz

umr bhar meri tarah sar ba gareban na raha