پھر سن رہا ہوں گزرے زمانے کی چاپ کو

پھر سن رہا ہوں گزرے زمانے کی چاپ کو

بھولا ہوا تھا دیر سے میں اپنے آپ کو

رہتے ہیں کچھ ملول سے چہرے پڑوس میں

اتنا نہ تیز کیجیے ڈھولک کی تھاپ کو

اشکوں کی ایک نہر تھی جو خشک ہو گئی

کیوں کر مٹاؤں دل سے ترے غم کی چھاپ کو

کتنا ہی بے کنار سمندر ہو پھر بھی دوست

رہتا ہے بے قرار ندی کے ملاپ کو

پہلے تو میری یاد سے آئی حیا انہیں

پھر آئنے میں چوم لیا اپنے آپ کو

تعریف کیا ہو قامت دل دار کی شکیبؔ

تجسیم کر دیا ہے کسی نے الاپ کو

phir sun raha hun guzre zamane ki chap ko

bhula hua tha der se main apne ap ko

rahte hain kuchh malul se chehre paros mein

itna na tez kijiye dholak ki thap ko

ashkon ki ek nahr thi jo khushk ho gai

kyun kar mitaun dil se tire gham ki chhap ko

kitna hi be kanar samundar ho phir bhi dost

rahta hai be qarar nadi ke milap ko

pahle to meri yad se ai haya unhen

phir aine mein chum liya apne ap ko

taarif kya ho qamat-e-dil dar ki shakeb

tajsim kar diya hai kisi ne alap ko