پھر رگ شعلۂ جاں سوز میں نشتر گزرا

پھر رگ شعلۂ جاں سوز میں نشتر گزرا

نالہ کیوں آبلۂ دل سے الجھ کر گزرا

میں ہوں دل دارئ افسون وفا پر نازاں

جو رقیبوں پہ نہ گزرا تھا وہ مجھ پر گزرا

کیا محیط مئے بے رنگ میں طوفاں آیا

جوش رنگ انجمن ناز سے باہر گزرا

تشنۂ حسرت جاوید ہوں میں کیا جانوں

کیوں گلے سے مرے تلخابۂ کوثر گزرا

آؤ میرے دل افسردہ کی تمکیں دیکھو

جاؤ اس کشمکش ناز سے میں در گزرا

لٹ گئی جان تو امید کے پہلو ڈھونڈے

مٹ گئی راہ تو اندیشۂ رہبر گزرا

اس تکلف سے گئی عمر گراں مایہ وفاؔ

ایک دم سینکڑوں برسوں کے برابر گزرا

phir rag-e-shola-e-jan soz mein nashtar guzra

nala kyun abla-e-dil se ulajh kar guzra

main hun dil dari-e-afsun-e-wafa par nazan

jo raqibon pe na guzra tha wo mujh par guzra

kya muhit-e-mai be rang mein tufan aya

josh-e-rang-e-anjuman-e-naz se bahar guzra

tishna-e-hasrat-e-jawed hun main kya janun

kyun gale se mire talkhaba-e-kausar guzra

ao mere dil-e-afsurda ki tamkin dekho

jao is kashmakash-e-naz se main dar guzra

lut gai jan to ummid ke pahlu dhunde

mit gai rah to andesha-e-rahbar guzra

is takalluf se gai umr-e-giran maya wafa

ek dam sainkron barson ke barabar guzra