پھری ہوئی مری آنکھیں ہیں تیغ زن کی طرف

پھری ہوئی مری آنکھیں ہیں تیغ زن کی طرف

چلا ہے چھوڑ کے بسمل مجھے ہرن کی طرف

بنایا توڑ کے آئینہ آئینہ خانہ

نہ دیکھی راہ جو خلوت سے انجمن کی طرف

رہ وفا کو نہ چھوڑا وہ عندلیب ہوں میں

چھٹا قفس سے تو پرواز کی چمن کی طرف

گریز چاہئے طول امل سے سالک کو

سنا ہے راہ یہ جاتی ہے راہزن کی طرف

سرائے دہر میں سوؤ گے غافلو کب تک

اٹھو تو کیا تمہیں جانا نہیں وطن کی طرف

جو اہل دل ہیں الگ ہیں وہ اہل ظاہر سے

نہ میں ہوں شیخ کی جانب نہ برہمن کی طرف

جہان حادثہ آگین میں بشر کا ورود

گزر حباب کا دریائے موجزن کی طرف

اسی امید پہ ہم دن خزاں کے کاٹتے ہیں

کبھی تو باد بہار آئے گی چمن کی طرف

بچھڑ کے تجھ سے مجھے ہے امید ملنے کی

سنا ہے روح کو آنا ہے پھر بدن کی طرف

گواہ کون مرے قتل کا ہو محشر میں

ابھی سے سارا زمانہ ہے تیغ زن کی طرف

خبر دی اٹھ کے قیامت نے اس کے آنے کی

خدا ہی خیر کرے رخ ہے انجمن کی طرف

وہ اپنے رخ کی صباحت کو آپ دیکھتے ہیں

جھکے ہوئے گل نرگس ہیں یاسمن کی طرف

تمام بزم ہے کیا محو اس کی باتوں میں

نظر دہن کی طرف کان ہے سخن کی طرف

اسیر ہو گیا دل گیسوؤں میں خوب ہوا

چلا تھا ڈوب کے مرنے چہ ذقن کی طرف

یہ میکشوں کی ادا ابر تر بھی سیکھ گئے

کنار جو سے جو اٹھے چلے چمن کی طرف

زہے نصیب جو ہو کربلا کی موت اے نظمؔ

کہ اڑ کے خاک شفا آئے خود کفن کی طرف

phiri hui miri ankhen hain tegh zan ki taraf

chala hai chhor ke bismil mujhe hiran ki taraf

banaya tor ke aina aina khana

na dekhi rah jo khalwat se anjuman ki taraf

rah-e-wafa ko na chhora wo andalib hun main

chhuta qafas se to parwaz ki chaman ki taraf

gurez chahiye tul-e-amal se salik ko

suna hai rah ye jati hai rahzan ki taraf

sarae dahr mein sooge ghafilo kab tak

utho to kya tumhen jana nahin watan ki taraf

jo ahl-e-dil hain alag hain wo ahl-e-zahir se

na main hun shaikh ki janib na barahman ki taraf

jahan-e-hadisa agyun mein bashar ka warod

guzar habab ka dariya-e-maujzan ki taraf

isi umid pe ham din khizan ke katte hain

kabhi to bad-e-bahar aegi chaman ki taraf

bichhar ke tujh se mujhe hai umid milne ki

suna hai ruh ko ana hai phir badan ki taraf

gawah kaun mire qatl ka ho mahshar mein

abhi se sara zamana hai tegh zan ki taraf

khabar di uth ke qayamat ne us ke ane ki

khuda hi khair kare rukh hai anjuman ki taraf

wo apne rukh ki sabahat ko ap dekhte hain

jhuke hue gul-e-nargis hain yasaman ki taraf

tamam bazm hai kya mahw us ki baton mein

nazar dahan ki taraf kan hai sukhan ki taraf

asir ho gaya dil gesuon mein khub hua

chala tha dub ke marne cha zaqan ki taraf

ye maikashon ki ada abr-e-tar bhi sikh gae

kanar jo se jo uthe chale chaman ki taraf

zahe nasib jo ho karbala ki maut ai nazm

ke ur ke khak-e-shifa ae khud kafan ki taraf