پھل ہے اس بت کی آشنائی کا

پھل ہے اس بت کی آشنائی کا

مجھ کو دعویٰ ہے اب خدائی کا

نہ لڑاؤ نظر رقیبوں سے

کام اچھا نہیں لڑائی کا

آسماں پر نہیں ہلال نمود

نعل ہے تیری زیر پائی کا

گل میں تھی اس قدر کہاں سرخی

عکس ہے پنجۂ حنائی کا

کس ستم گر سے تو نے اے کافر

طرز سیکھا ہے دل ربائی کا

چادر آسمان حاضر ہو

تو جو استر کرے رضائی کا

وقت کیا آ گیا ہے صد افسوس

بھائی دشمن ہوا ہے بھائی کا

گو برہمن پسر وہ قاتل ہے

دل ملا ہے مگر قصائی کا

کچھ مرا ہی نہیں وہ بت معبود

بخدا ہے خدا خدائی کا

سحرؔ کیا اس نے کر دیا جادو

مجھ کو دعویٰ تھا پارسائی کا

phal hai us but ki ashnai ka

mujh ko daawa hai ab khudai ka

na larao nazar raqibon se

kam achchha nahin larai ka

asman par nahin hilal numud

naal hai teri zer pai ka

gul mein thi is qadar kahan surkhi

aks hai panja-e-hinai ka

kis sitam gar se tu ne ai kafir

tarz sikha hai dil rabai ka

chadar-e-asman-e-hazir ho

tu jo astar kare rizai ka

waqt kya a gaya hai sad afsos

bhai dushman hua hai bhai ka

go barahman pisar wo qatil hai

dil mila hai magar qissai ka

kuchh mira hi nahin wo but maabud

bakhuda hai khuda khudai ka

sehr kya us ne kar diya jadu

mujh ko daawa tha parsai ka