پھر وہی ہم ہیں خیال رخ زیبا ہے وہی

پھر وہی ہم ہیں خیال رخ زیبا ہے وہی

سر شوریدہ وہی عشق کا سودا ہے وہی

دانہ و دام سنبھالا مرے صیاد نے پھر

اپنی گردن ہے وہی عشق کا پھندا ہے وہی

پھر لگی رہنے تصور میں وہ مژگان دراز

رگ جاں میں خلش خار تمنا ہے وہی

پھر لگا رہنے وہی سلسلۂ ناز و نیاز

جلوۂ حسن وہی ذوق تماشا ہے وہی

پھر ہوا ہم کو دل و دیں کا بچانا مشکل

نگۂ ناز کا پھر ہم سے تقاضا ہے وہی

ناز نے پھر کیا آغاز وہ انداز نیاز

حسن جاں سوز کو پھر سوز کا دعویٰ ہے وہی

محو دید چمن شوق ہے پھر دیدۂ شوق

گل شاداب وہی بلبل شیدا ہے وہی

پھر چمک اٹھی وہ کجلائی ہوئی چنگاری

رخت ہستی ہے وہی عشق کا شعلہ ہے وہی

آرزو جی اٹھی پھر پیار جو اس بت نے کیا

پھر لب یار میں اعجاز مسیحا ہے وہی

پاس ناموس نے پھر رخصت رفتن چاہی

شہرت حسن وہی الفت رسوا ہے وہی

پھر ہوئی لیلیٰ و مجنوں کی حکایت تازہ

ان کا عالم وہی نیرنگؔ کا نقشہ ہے وہی

phir wahi ham hain khayal-e-rukh-e-zeba hai wahi

sar-e-shorida wahi ishq ka sauda hai wahi

dana-o-dam sambhala mire sayyad ne phir

apni gardan hai wahi ishq ka phanda hai wahi

phir lagi rahne tasawwur mein wo mizhgan-e-daraz

rag-e-jan mein khalish-e-khar-e-tamanna hai wahi

phir laga rahne wahi silsila-e-naz-o-niyaz

jalwa-e-husn wahi zauq-e-tamasha hai wahi

phir hua ham ko dil-o-din ka bachana mushkil

nigah-e-naz ka phir ham se taqaza hai wahi

naz ne phir kiya aghaz wo andaz-e-niyaz

husn-e-jan soz ko phir soz ka daawa hai wahi

mahw-e-did chaman shauq hai phir dida-e-shauq

gul-e-shadab wahi bulbul-e-shaida hai wahi

phir chamak uthi wo kajlai hui chingari

rakht-e-hasti hai wahi ishq ka shola hai wahi

arzu ji uthi phir pyar jo us but ne kiya

phir lab-e-yar mein ejaz-e-masiha hai wahi

pas-e-namus ne phir rukhsat-e-raftan chahi

shohrat husn wahi ulfat ruswa hai wahi

phir hui laila-o-majnun ki hikayat taza

un ka alam wahi nairang ka naqsha hai wahi