تجرید

زندگی میں ترے دروازے پر

اک بھکاری کی طرح آیا تھا

اپنے دامن کو بنا کر کشکول

تیری ہر راہ پہ پھیلایا تھا

ایک مرحوم کرن کی خاطر

مجھ کو تھوڑی سی ضیا بھی نہ ملی

دم بہ دم ڈوبتے سیارے کو

اپنے مرکز سے صدا بھی نہ ملی

دفعتاً ایک دھماکے کے ساتھ

کچے دھاگوں کے سرے چھوٹ گئے

انگلیاں چھل گئیں ارمانوں کی

یک بہ یک تار نفس ٹوٹ گئے

اور پھر ایک گھنا سناٹا

اور پھر رسم کہن کے گیسو

کچھ دلاسے کی زبانی باتیں

کچھ دکھاوے کے پرانے آنسو

کہر میں ڈوب گئی تھیں شمعیں

وقت ناراض تھا قسمت کی طرح

رات کے رخ پہ تھے زخموں کے نشان

میری مجروح حمیت کی طرح

اک خطرناک کگارے کے قریب

تجھ سے لڑنے کا ارادہ لے کر

میں نے مہروں کو سکھائی شورش

میں نے موجوں کے بگاڑے تیور

تو مگر آئی تو اک لمحے میں

نہ وہ تیور تھے نہ وہ آہیں تھیں

تیرے عارض پہ مرے آنسو تھے

میری گردن میں تری باہیں تھیں

zindagi mein tire darwaze par

ik bhikari ki tarah aya tha

apne daman ko bana kar kashkol

teri har rah pe phailaya tha

ek marhum kiran ki khatir

mujh ko thori si ziya bhi na mili

dam ba dam dubte sayyare ko

apne markaz se sada bhi na mili

dafatan ek dhamake ke sath

kachche dhagon ke sire chhut gae

ungliyan chhal gain armanon ki

yak ba yak tar-e-nafas tut gae

aur phir ek ghana sannata

aur phir rasm-e-kuhan ke gesu

kuchh dilase ki zabani baten

kuchh dikhawe ke purane ansu

kohr mein dub gai thin shamen

waqt naraz tha qismat ki tarah

rat ke rukh pe the zakhmon ke nishan

meri majruh hamiyyat ki tarah

ik khatarnak kagare ke qarib

tujh se larne ka irada le kar

main ne mehron ko sikhai shorish

main ne maujon ke bigare tewar

tu magar ai to ik lamhe mein

na wo tewar the na wo ahen thin

tere ariz pe mire ansu the

meri gardan mein tiri bahen thin