پامال خرام ناز کیجے

پامال خرام ناز کیجے

ٹھکرائیے سرفراز کیجے

دل تم نے لیا زبان دے کر

عاشق کا نہ فاش راز کیجے

سوز تپ ہجر کا یہ ہے حکم

تن شمع صفت گداز کیجے

محمود ہوا ہے حسن صاحب

پہلے مجھ کو ایاز کیجے

ہو کوئی قضا جو بادہ خوارو

بھٹی پہ ادا نماز کیجے

کہتا ہے یہ ناز دل ربائی

اے عاشقو جان نیاز کیجے

ناساز زمانہ کا نہیں غم

ہاں کار زمانہ ساز کیجے

غیروں سے تو ہے وقارؔ بہتر

اب آپ بھی امتیاز کیجے

pamal-e-khiram-e-naz kije

thukraiye sarfaraz kije

dil tum ne liya zaban de kar

ashiq ka na fash raz kije

soz-e-tap hijr ka ye hai hukm

tan shama sifat gudaz kije

mahmud hua hai husn sahab

pahle mujh ko ayaz kije

ho koi qaza jo bada khwaro

bhatti pe ada namaz kije

kahta hai ye naz-e-dil rabai

ai ashiqo jan-e-niyaz kije

nasaz zamana ka nahin gham

han kar-e-zamana saz kije

ghairon se to hai waqar behtar

ab ap bhi imtiyaz kije