پتھر سے نہ مارو مجھے دیوانہ سمجھ کر

پتھر سے نہ مارو مجھے دیوانہ سمجھ کر

آیا ہوں ادھر کوچۂ جانانہ سمجھ کر

کہتے ہیں یہ رونے سے لگی دل کی بجھے گی

سمجھاتے ہیں اپنا مجھے پروانہ سمجھ کر

میں وہ ہوں کہ سیری مجھے ہوتی نہیں مے سے

دینا مرے ساقی مجھے پیمانہ سمجھ کر

نخوت سے جو اک بات نہ سنتے تھے ہماری

خود چھیڑ رہے ہیں ہمیں دیوانہ سمجھ کر

ہم ان کے ہیں دل ان کا ہے جاں ان کی ہے لیکن

پھر منہ کو چھپاتے ہیں وہ بیگانہ سمجھ کر

رکھا نہ کہیں کا ہمیں بربادئ دل نے

ارمان ٹھہرتے نہیں ویرانہ سمجھ کر

دیکھ آپ سے باہر نہ ہو منصور کی صورت

کرنا ہے تو کر نعرۂ مستانہ سمجھ کر

ہم اور ہی کچھ ڈھونڈتے پھرتے ہیں بتوں میں

بت خانے میں جاتے نہیں بت خانہ سمجھ کر

خوباں سے پٹے یا نہ پٹے وصل کا سودا

دل پہلے ہی لے لیتے ہیں بیعانہ سمجھ کر

ساقی کی جو آنکھوں کو ہوئی بزم میں گردش

ہم لوٹ گئے گردش پیمانہ سمجھ کر

کہہ جاتے حفیظؔ ان کو ہو تم جوش میں کیا کچھ

وہ طرح دیے جاتے ہیں دیوانہ سمجھ کر

patthar se na maro mujhe diwana samajh kar

aya hun idhar kucha-e-janana samajh kar

kahte hain ye rone se lagi dil ki bujhegi

samjhate hain apna mujhe parwana samajh kar

main wo hun ke sairi mujhe hoti nahin mai se

dena mire saqi mujhe paimana samajh kar

nakhwat se jo ik bat na sunte the hamari

khud chher rahe hain hamen diwana samajh kar

ham un ke hain dil un ka hai jan un ki hai lekin

phir munh ko chhupate hain wo begana samajh kar

rakha na kahin ka hamen barbadi-e-dil ne

arman thaharte nahin wirana samajh kar

dekh ap se bahar na ho mansur ki surat

karna hai to kar naara-e-mastana samajh kar

ham aur hi kuchh dhundte phirte hain buton mein

but khane mein jate nahin but khana samajh kar

khuban se pite ya na pite wasl ka sauda

dil pahle hi le lete hain baiana samajh kar

saqi ki jo ankhon ko hui bazm mein gardish

ham laut gae gardish-e-paimana samajh kar

kah jate hafiz un ko ho tum josh mein kya kuchh

wo tarah diye jate hain diwana samajh kar