آخر دل کی پرانی لگن کر کے ہی رہے گی فقیر ہمیں

آخر دل کی پرانی لگن کر کے ہی رہے گی فقیر ہمیں

ہر رت آتے جاتے پائے ایک ہی شے کا اسیر ہمیں

دھوم مچائے بہار کبھی اور پات ہرے کبھی پیلے ہوں

ہر نیرنگیٔ قدرت دیکھے یکساں ہی دلگیر ہمیں

کیا کیا پکاریں سسکتی دیکھیں لفظوں کے زندانوں میں

چپ ہی کی تلقین کرے ہے غیرت مند ضمیر ہمیں

جن کی ہلکی گہری تلخی خون میں رچ رچ جاتی ہے

جزو حیات بنانے پڑے ہیں وہ اشعار میرؔ ہمیں

akhir dil ki purani lagan kar ke hi rahegi faqir hamen

har rut ate jate pae ek hi shai ka asir hamen

dhum machae bahar kabhi aur pat hare kabhi pile hun

har nairangi-e-qudrat dekhe yaksan hi dilgir hamen

kya kya pukaren sisakti dekhen lafzon ke zindanon mein

chup hi ki talqin kare hai ghairat mand zamir hamen

jin ki halki gahri talkhi khun mein rach rach jati hai

juzw-e-hayat banane pare hain wo ashar mir hamen