پاس ادب میں جوش تمنا لئے ہوئے

پاس ادب میں جوش تمنا لئے ہوئے

میں بھی ہوں اک حباب میں دریا لئے ہوئے

رگ رگ میں اور کچھ نہ رہا جز خیال دوست

اس شوخ کو ہوں آج سراپا لئے ہوئے

سرمایۂ حیات ہے حرمان عاشقی

ہے ساتھ ایک صورت زیبا لئے ہوئے

جوش جنوں میں چھوٹ گیا آستان یار

روتے ہیں منہ میں دامن صحرا لئے ہوئے

اصغرؔ ہجوم درد غریبی میں اس کی یاد

آئی ہے ایک طلسمی تمنا لئے ہوئے

pas-e-adab mein josh-e-tamanna liye hue

main bhi hun ik habab mein dariya liye hue

rag rag mein aur kuchh na raha juz khayal-e-dost

us shokh ko hun aj sarapa liye hue

sarmaya-e-hayat hai hirman-e-ashiqi

hai sath ek surat-e-zeba liye hue

josh-e-junun mein chhut gaya astan-e-yar

rote hain munh mein daman-e-sahra liye hue

asghar hujum-e-dard-e-gharibi mein us ki yad

ai hai ek tilismi tamanna liye hue