وہی جھکی ہوئی بیلیں وہی دریچہ تھا

وہی جھکی ہوئی بیلیں وہی دریچہ تھا

مگر وہ پھول سا چہرہ نظر نہ آتا تھا

میں لوٹ آیا ہوں خاموشیوں کے صحرا سے

وہاں بھی تیری صدا کا غبار پھیلا تھا

شب سفر تھی قبا تیرگی کی پہنے ہوئے

کہیں کہیں پہ کوئی روشنی کا دھبا تھا

یہ آڑی ترچھی لکیریں بنا گیا ہے کون

میں کیا کہوں مرے دل کا ورق تو سادا تھا

میں خاکداں سے نکل کر بھی کیا ہوا آزاد

ہر اک طرف سے مجھے آسماں نے گھیرا تھا

ادھر سے بارہا گزرا مگر خبر نہ ہوئی

کہ زیر سنگ خنک پانیوں کا چشمہ تھا

وہ اس کا عکس بدن تھا کہ چاندنی کا کنول

وہ نیلی جھیل تھی یا آسماں کا ٹکڑا تھا

میں ساحلوں میں اتر کر شکیبؔ کیا لیتا

ازل سے نام مرا پانیوں پہ لکھا تھا

wahi jhuki hui belen wahi daricha tha

magar wo phul sa chehra nazar na ata tha

main laut aya hun khamoshiyon ke sahra se

wahan bhi teri sada ka ghubar phaila tha

shab-e-safar thi qaba tirgi ki pahne hue

kahin kahin pe koi raushni ka dhabba tha

ye ari tirchhi lakiren bana gaya hai kaun

main kya kahun mire dil ka waraq to sada tha

main khakdan se nikal kar bhi kya hua azad

har ik taraf se mujhe asman ne ghera tha

idhar se barha guzra magar khabar na hui

ke zer-e-sang khunuk paniyon ka chashma tha

wo us ka aks badan tha ke chandni ka kanwal

wo nili jhil thi ya asman ka tukra tha

main sahilon mein utar kar shakeb kya leta

azal se nam mira paniyon pe likha tha