وہاں کی روشنیوں نے بھی ظلم ڈھائے بہت

وہاں کی روشنیوں نے بھی ظلم ڈھائے بہت

میں اس گلی میں اکیلا تھا اور سائے بہت

کسی کے سر پہ کبھی ٹوٹ کر گرا ہی نہیں

اس آسماں نے ہوا میں قدم جمائے بہت

نہ جانے رت کا تصرف تھا یا نظر کا فریب

کلی وہی تھی مگر رنگ جھلملائے بہت

ہوا کا رخ ہی اچانک بدل گیا ورنہ

مہک کے قافلے صحرا کی سمت آئے بہت

یہ کائنات ہے میری ہی خاک کا ذرہ

میں اپنے دشت سے گزرا تو بھید پائے بہت

جو موتیوں کی طلب نے کبھی اداس کیا

تو ہم بھی راہ سے کنکر سمیٹ لائے بہت

بس ایک رات ٹھہرنا ہے کیا گلہ کیجے

مسافروں کو غنیمت ہے یہ سرائے بہت

جمی رہے گی نگاہوں پہ تیرگی دن بھر

کہ رات خواب میں تارے اتر کے آئے بہت

شکیبؔ کیسی اڑان اب وہ پر ہی ٹوٹ گئے

کہ زیر دام جب آئے تھے پھڑپھڑائے بہت

wahan ki raushniyon ne bhi zulm dhae bahut

main us gali mein akela tha aur sae bahut

kisi ke sar pe kabhi tut kar gira hi nahin

is asman ne hawa mein qadam jamae bahut

na jane rut ka tasarruf tha ya nazar ka fareb

kali wahi thi magar rang jhilmilae bahut

hawa ka rukh hi achanak badal gaya warna

mahak ke qafile sahra ki samt ae bahut

ye kainat hai meri hi khak ka zarra

main apne dasht se guzra to bhed pae bahut

jo motiyon ki talab ne kabhi udas kiya

to ham bhi rah se kankar samet lae bahut

bas ek rat thaharna hai kya gila kije

musafiron ko ghanimat hai ye sarae bahut

jami rahegi nigahon pe tirgi din bhar

ke rat khwab mein tare utar ke ae bahut

shakeb kaisi uran ab wo par hi tut gae

ke zer-e-dam jab ae the pharpharae bahut