تجھ بن تو کبھی گل کے تئیں بو نہ کروں میں

تجھ بن تو کبھی گل کے تئیں بو نہ کروں میں

مر جاؤں پہ گلشن کی طرف رو نہ کروں میں

گر جعد کو سنبل کی صبا بیچنے لاوے

خاطر سے تری قیمت یک مو نہ کروں میں

پلے میں ترے حسن کے گو ہو وہ گراں تر

یوسف کو ترا سنگ ترازو نہ کروں میں

یوں دل کو گرفتار رکھوں صید الم میں

پر اور کا صید خم گیسو نہ کروں میں

گر حور و پری دل کو لبھاوے مرے آ کر

واللہ کہ اس پر کبھی جادو نہ کروں میں

گر مرثیہ خوانی پہ دل آوے کبھی میرا

تو ہووے تو داؤد کو بازو نہ کروں میں

ہوں بسکہ ہوا دار تری آتش غم کا

پھنک جائے جو سینہ تو کبھو ہو نہ کروں میں

یوں دیکھوں تو دیکھوں کسی خوش وضع کو لیکن

خواہش کی نظر بر رخ نیکو نہ کروں میں

بلبل کی طرح گل پہ نہ ہوں زمزمہ پرواز

قمری کی طرح سرو پہ کو کو نہ کروں میں

جب رات ہو زانو پہ رکھو اپنے سر اپنا

پر تکیۂ سر غیر کا زانو نہ کروں میں

محراب کے کعبے کا نمازی ہوں تو واں بھی

جز سجدۂ طاق خم ابرو نہ کروں میں

جب تک نہ کھلیں مجھ سے ترے حسن کے عقدے

ہرگز ہوس نافۂ آہو نہ کروں میں

ہم خوابہ اگر ہووے مری حور بہشتی

ایدھر سے ادھر کو کبھی پہلو نہ کروں میں

کوئی اور تو کب مجھ کو لبھا سکتا ہے لیکن

ڈرتا ہوں تصور سے ترے خو نہ کروں میں

اے مصحفیؔ ہے عہد کہ جب تک نہ وہ گل ہو

گلگشت گل و سیر لب جو نہ کروں میں

tujh bin to kabhi gul ke tain bu na karun main

mar jaun pe gulshan ki taraf ro na karun main

gar jaad ko sumbul ki saba bechne lawe

khatir se tiri qimat yak mu na karun main

pale mein tire husn ke go ho wo giran tar

yusuf ko tira sang tarazu na karun main

yun dil ko giraftar rakhun said-e-alam mein

par aur ka said-e-kham gesu na karun main

gar hur-o-pari dil ko lubhawe mire a kar

wallah ke us par kabhi jadu na karun main

gar marsiya khwani pe dil awe kabhi mera

tu howe to daud ko bazu na karun main

hun baske hua dar tiri atish-e-gham ka

phink jae jo sina to kabhu ho na karun main

yun dekhun to dekhun kisi khush waza ko lekin

khwahish ki nazar bar rukh neko na karun main

bulbul ki tarah gul pe na hun zamzama parwaz

qumri ki tarah sarw pe ko ko na karun main

jab rat ho zanu pe rakho apne sar apna

par takiya-e-sar ghair ka zanu na karun main

mehrab ke kaabe ka namazi hun to wan bhi

juz sajda-e-taq-e-kham abru na karun main

jab tak na khulen mujh se tire husn ke uqde

hargiz hawas-e-nafa-e-ahu na karun main

ham khawaba agar howe miri hur-e-bahishti

idhar se idhar ko kabhi pahlu na karun main

koi aur to kab mujh ko lubha sakta hai lekin

darta hun tasawwur se tire khu na karun main

ai mushafi hai ahd ke jab tak na wo gul ho

gulgasht-e-gul-o-sair-e-lab jo na karun main