وہی عاشق ہے قاتل کا نہ جو شاکی وہاں ہوگا
بیخود موہانیوہی عاشق ہے قاتل کا نہ جو شاکی وہاں ہوگا
جسے دار جزا سمجھے ہیں دار امتحاں ہوگا
جدا سب عالموں سے ایک دن تیرا جہاں ہوگا
محبت کی زمیں ہوگی وفا کا آسماں ہوگا
نہ میں دیر و حرم سمجھوں نہ میں عرش و ارم جانوں
جہاں سجدے کو دل جھک جائے تیرا آستاں ہوگا
امیدیں دل کی وابستہ ہیں میدان قیامت سے
نہ اس جا یہ زمیں ہوگی نہ واں یہ آسماں ہوگا
چھڑایا جس نے دامن کاش اس کو یہ خبر ہوتی
کہ عنوان قیامت درد دل کی داستاں ہوگا
وہ جنت ہے جو زاہد کے سفر کی آخری منزل
اسی میں پہلی منزل پر ہمارا کارواں ہوگا
اسیری میں گری ہیں آہ لاکھوں بجلیاں دل پر
جہاں بجلی گری سمجھے ہمارا آشیاں ہوگا
فراق جاودانی انتقام وصل جاناں ہے
مگر صدقے ترے جانے بھی دے اے آسماں ہوگا
فسانہ دہر و گلزار و بہار و گل کا رہنے دے
اگر کچھ ہے بھی اے بیخودؔ سوائے آشیاں ہوگا
wahi ashiq hai qatil ka na jo shaki wahan hoga
jise dar-e-jaza samjhe hain dar-e-imtihan hoga
juda sab alamon se ek din tera jahan hoga
mohabbat ki zamin hogi wafa ka asman hoga
na main dair-o-haram samjhun na main arsh-o-iram janun
jahan sajde ko dil jhuk jae tera astan hoga
ummiden dil ki wabasta hain maidan-e-qayamat se
na is ja ye zamin hogi na wan ye asman hoga
chhuraya jis ne daman kash us ko ye khabar hoti
ke unwan-e-qayamat dard-e-dil ki dastan hoga
wo jannat hai jo zahid ke safar ki akhiri manzil
isi mein pahli manzil par hamara karwan hoga
asiri mein giri hain ah lakhon bijliyan dil par
jahan bijli giri samjhe hamara ashiyan hoga
firaq-e-jawidani intiqam-e-wasl janan hai
magar sadqe tire jane bhi de ai asman hoga
fasana dahr-o-gulzar-o-bahar-o-gul ka rahne de
agar kuchh hai bhi ai bekhud siwae ashiyan hoga