وہ نظر آئینہ فطرت ہی سہی

وہ نظر آئینہ فطرت ہی سہی

مجھے حیرت ہے تو حیرت ہی سہی

زندگی داغ محبت ہی سہی

آپ سے دور کی نسبت ہی سہی

تم نہ چاہو تو نہیں کٹ سکتی

ایک لمحے کی مسافت ہی سہی

دل محبت کی ادا چاہتا ہے

ایک آنسو دم رخصت ہی سہی

آب حیواں بھی نہیں مجھ پہ حرام

زہر کی مجھ کو ضرورت ہی سہی

اپنی تقدیر میں سناٹا ہے

ایک ہنگامے کی حسرت ہی سہی

اس قدر شور طرب کیا معنی

جاگنے کی مجھے عادت ہی سہی

بزم رنداں سے تعلق کیسا

آپ کی میز پہ شربت ہی سہی

حد منزل ہے مقرر باقیؔ

رہرو شوق کو عجلت ہی سہی

wo nazar aina fitrat hi sahi

mujhe hairat hai to hairat hi sahi

zindagi dagh-e-mohabbat hi sahi

ap se dur ki nisbat hi sahi

tum na chaho to nahin kat sakti

ek lamhe ki masafat hi sahi

dil mohabbat ki ada chahta hai

ek ansu dam-e-rukhsat hi sahi

ab-e-haiwan bhi nahin mujh pe haram

zahr ki mujh ko zarurat hi sahi

apni taqdir mein sannata hai

ek hangame ki hasrat hi sahi

is qadar shor-e-tarab kya maani

jagne ki mujhe adat hi sahi

bazm-e-rindan se taalluq kaisa

ap ki mez pe sharbat hi sahi

had-e-manzil hai muqarrar baqi

rahrau shauq ko ujlat hi sahi