وہ مسیحا قبر پر آتا رہا

وہ مسیحا قبر پر آتا رہا

میں موے پر روز جی جاتا رہا

زندگی کی ہم نے مر مر کے بصر

وہ بت ترسا جو ترساتا رہا

واہ بخت نارسا دیکھا تجھے

نامہ بر سے خط کہیں جاتا رہا

راہ تکتے تکتے آخر جاں گئی

وہ تغافل کیش بس آتا رہا

دل تو دینے کو دیا پر ہم نشیں

ہاتھ میں مل مل کے پچھتاتا رہا

دیکھ اس کو ہو گیا میں بے خبر

دل یکایک ہاتھ سے جاتا رہا

کیا کہوں کس طرح فرقت میں جیا

خون دل پیتا تو غم کھاتا رہا

رات بھر اوس برق وش کی یاد میں

سیل اشک آنکھوں سے برساتا رہا

ڈھونڈھتا پھرتا ہوں اس کو جا بہ جا

دل خدا جانے کدھر جاتا رہا

اس مسیحا کی امید وصل میں

شام جیتا صبح مر جاتا رہا

عشق کا رعناؔ مرض ہے لا دوا

کب سنا تو نے کہ وہ جاتا رہا

wo masiha qabr par ata raha

main mue par roz ji jata raha

zindagi ki ham ne mar mar ke basar

wo but-e-tarsa jo tarasita raha

wah bakht-e-narasa dekha tujhe

nama bar se khat kahin jata raha

rah takte takte akhir jan gai

wo taghaful kesh bas ata raha

dil to dene ko diya par ham nashin

hath mein mil mil ke pachhtata raha

dekh us ko ho gaya main be khabar

dil yakayak hath se jata raha

kya kahun kis tarah furqat mein jiya

khun-e-dil pita to gham khata raha

rat bhar os barq wash ki yad mein

sail-e-ashk ankhon se barasita raha

dhundhta phirta hun us ko ja ba ja

dil khuda jane kidhar jata raha

is masiha ki ummid-e-wasl mein

sham jita subh mar jata raha

ishq ka raana maraz hai la dawa

kab suna tu ne ke wo jata raha