وہ پارہ ہوں میں جو آگ میں ہوں وہ برق ہوں جو سحاب میں ہوں

وہ پارہ ہوں میں جو آگ میں ہوں وہ برق ہوں جو سحاب میں ہوں

زمیں پہ بھی اضطراب میں ہوں فلک پہ بھی اضطراب میں ہوں

نہ میں ہوا میں نہ خاک میں ہوں نہ آگ میں ہوں نہ آب میں ہوں

شمار میرا نہیں کسی میں اگرچہ میں بھی حساب میں ہوں

اگرچہ پانی کی موج بن کر ہمیشہ میں پیچ و تاب میں ہوں

وہی ہوں قطرہ وہی ہوں دریا جو عین چشم حباب میں ہوں

سلایا کس نے گلے لگا کر کہ صور بھی تھک گیا جگا کر

بپا ہے عالم میں شور محشر مجھے جو دیکھو تو خواب میں ہوں

مزا ہے ساقی ترے کرم سے ظہور میرا ہے تیرے دم سے

وہ بادہ ہوں جو ہوں میکدے میں وہ نشہ ہوں جو شراب میں ہوں

الٰہی وہ گورے گورے تلوے کہیں نہ ہو جائیں مجھ سے میلے

کہ خاک بن کر برنگ سرمہ ہمیشہ چشم رکاب میں ہوں

جو بھیس اپنا بدل کے آیا تو رنگ اطلاق منہ سے دھویا

کیا ہے پانی میں قید مجھ کو ہوا کی صورت حباب میں ہوں

غضب ہے جوش ظہور تیرا پکارتا ہے یہ نور تیرا

خدا نے اندھا کیا ہے جس کو اسی کے آگے حجاب میں ہوں

ہوئی ہے دونوں کی ایک حالت نہ چین اس کو نہ چین مجھ کو

ادھر وہ ہے محو شوخیوں میں ادھر جو میں اضطراب میں ہوں

الٰہی مجھ پر کرم ہو تیرا نہ کھول اعمال نامہ میرا

پکارتا ہے یہ خط قسمت کہ میں بھی فرد حساب میں ہوں

دماغ میں ہوں قدح کشوں کے دہن میں آیا ہوں مہ وشوں کے

نشہ وہ ہوں جو شراب میں ہوں مزا وو ہوں جو کباب میں ہوں

وہ اپنا چہرا اگر دکھائے یقین اندھوں کو خاک آئے

پکارتی ہے یہ بے حجابی کہ میں ازل سے حجاب میں ہوں

علاحدہ کر کے خود سے مجھ کو جو تو نے بخشا تو خاک بخشا

اگرچہ جنت مجھے ملی ہے الٰہی پھر بھی عذاب میں ہوں

ہجوم نظروں کا ہے وہ منہ پر دیا ہے دونو کو جس نے دھوکا

یقیں یہ مجھ کو پڑا ہے پردا گماں یہ ان کو نقاب میں ہوں

جو مجھ کو اس سے جدا کرو گے تو میرا نقصان کیا کرو گے

نہیں ہوں مانند صفر کچھ بھی اگرچہ میں بھی حساب میں ہوں

نہ آیا مر کر بھی چین مجھ کو اٹھا مری خاک سے بگولا

بتوں کا گیسو تو میں نہیں ہوں الٰہی کیوں پیچ و تاب میں ہوں

جو حال پوچھو تو اک کہانی نشان پوچھو تو بے نشانی

وہ ذرہ ہوں جو مٹا ہوا ہوں اگرچہ میں آفتاب میں ہوں

مٹا اگرچہ مزار میرا چھٹا نہ وہ شہسوار میرا

پکارتا ہے غبار میرا کہ میں بھی حاضر رکاب میں ہوں

کرم کی مائلؔ پہ بھی نظر ہو نظر میں پھر چلبلا اثر ہو

ازل سے امیدوار میں بھی الٰہی تیری جناب میں ہوں

wo para hun main jo ag mein hun wo barq hun jo sahab mein hun

zamin pe bhi iztirab mein hun falak pe bhi iztirab mein hun

na main hawa mein na khak mein hun na ag mein hun na ab mein hun

shumar mera nahin kisi mein agarche mein bhi hisab mein hun

agarche pani ki mauj ban kar hamesha mein pech-o-tab mein hun

wahi hun qatra wahi hun dariya jo ain chashm-e-habab mein hun

sulaya kis ne gale laga kar ke sur bhi thak gaya jaga kar

bapa hai alam mein shor-e-mahshar mujhe jo dekho to khwab mein hun

maza hai saqi tire karam se zuhur mera hai tere dam se

wo bada hun jo hun maikade mein wo nasha hun jo sharab mein hun

ilahi wo gore gore talwe kahin na ho jaen mujh se mele

ke khak ban kar barang-e-surma hamesha chashm-e-rikab mein hun

jo bhes apna badal ke aya to rang itlaq munh se dhoya

kya hai pani mein qaid mujh ko hawa ki surat habab mein hun

ghazab hai josh-e-zuhur tera pukarta hai ye nur tera

khuda ne andha kiya hai jis ko usi ke age hijab mein hun

hui hai donon ki ek halat na chain us ko na chain mujh ko

idhar wo hai mahw-e-shokhiyon mein idhar jo main iztirab mein hun

ilahi mujh par karam ho tera na khol aamal nama mera

pukarta hai ye khat-e-qismat ke main bhi fard-e-hisab mein hun

dimagh mein hun qadah kashon ke dahan mein aya hun mah washon ke

nasha wo hun jo sharab mein hun maza wo hun jo kabab mein hun

wo apna chehra agar dikhae yaqin andhon ko khak ae

pukarti hai ye be hijabi ke main azal se hijab mein hun

alahida kar ke khud se mujh ko jo tu ne bakhsha to khak bakhsha

agarche jannat mujhe mili hai ilahi phir bhi azab mein hun

hujum-e-nazron ka hai wo munh par diya hai dauno ko jis ne dhoka

yaqin ye mujh ko para hai parda guman ye un ko naqab mein hun

jo mujh ko us se juda karoge to mera nuqsan kya karoge

nahin hun manind-e-sifr kuchh bhi agarche mein bhi hisab mein hun

na aya mar kar bhi chain mujh ko utha miri khak se bagula

buton ka gesu to main nahin hun ilahi kyun pech-o-tab mein hun

jo hal puchho to ik kahani nishan puchho to be nishani

wo zarra hun jo mita hua hun agarche mein aftab mein hun

mita agarche mazar mera chhuta na wo shahsawar mera

pukarta hai ghubar mera ke main bhi hazir rikab mein hun

karam ki mail pe bhi nazar ho nazar mein phir chulbula asar ho

azal se umidwar mein bhi ilahi teri janab mein hun