وہ نقاب آپ سے اٹھ جائے تو کچھ دور نہیں

وہ نقاب آپ سے اٹھ جائے تو کچھ دور نہیں

ورنہ میری نگہ شوق بھی مجبور نہیں

خاطر اہل نظر حسن کو منظور نہیں

اس میں کچھ تیری خطا دیدۂ مہجور نہیں

لاکھ چھپتے ہو مگر چھپ کے بھی مستور نہیں

تم عجب چیز ہو نزدیک نہیں دور نہیں

جرأت عرض پہ وہ کچھ نہیں کہتے لیکن

ہر ادا سے یہ ٹپکتا ہے کہ منظور نہیں

دل دھڑک اٹھتا ہے خود اپنی ہی ہر آہٹ پر

اب قدم منزل جاناں سے بہت دور نہیں

ہائے وہ وقت کہ جب بے پیے مدہوشی تھی

ہائے یہ وقت کہ اب پی کے بھی مخمور نہیں

حسن ہی حسن ہے جس سمت اٹھاتا ہوں نظر

اب یہاں طور نہیں برق سر طور نہیں

دیکھ سکتا ہوں جو آنکھوں سے وہ کافی ہے مجازؔ

اہل عرفاں کی نوازش مجھے منظور نہیں

wo naqab ap se uth jae to kuchh dur nahin

warna meri nigah-e-shauq bhi majbur nahin

khatir-e-ahl-e-nazar husn ko manzur nahin

is mein kuchh teri khata dida-e-mahjur nahin

lakh chhupte ho magar chhup ke bhi mastur nahin

tum ajab chiz ho nazdik nahin dur nahin

jurat-e-arz pe wo kuchh nahin kahte lekin

har ada se ye tapakta hai ke manzur nahin

dil dharak uthta hai khud apni hi har ahat par

ab qadam manzil janan se bahut dur nahin

hae wo waqt ke jab be piye madhoshi thi

hae ye waqt ke ab pi ke bhi makhmur nahin

husn hi husn hai jis samt uthata hun nazar

ab yahan tur nahin barq-e-sar-e-tur nahin

dekh sakta hun jo ankhon se wo kafi hai majaz

ahl-e-irfan ki nawazish mujhe manzur nahin