Arooz is now on the App Store, for iPhone and iPad. Download →

All poetry

وہ نازنیں یہ نزاکت میں کچھ یگانہ ہوا

Haidar Ali Aatish (1778–1847)

وہ نازنیں یہ نزاکت میں کچھ یگانہ ہوا

جو پہنی پھولوں کی بدھی تو درد شانہ ہوا

شہید ناز و ادا کا ترے زمانہ ہوا

اڑایا مہندی نے دل چور کا بہانہ ہوا

شب اس کے افعئ گیسو کا جو فسانہ ہوا

ہوا کچھ ایسی بندھی گل چراغ خانہ ہوا

نہ زلف یار کا خاکہ بھی کر سکا مانی

ہر ایک بال میں کیا کیا نہ شاخسانہ ہوا

تونگروں کو مبارک ہو شمع کافوری

قدم سے یار کے روشن غریب خانہ ہوا

گناہ گار ہیں محراب تیغ کے ساجد

جھکایا سر تو ادا فرض پنجگانہ ہوا

غرور عشق زیادہ غرور حسن سے ہے

ادھر تو آنکھ بھری دم ادھر روانہ ہوا

دکھا دے زاہد مغرور کو بھی اے صنم آنکھ

جمال حور کا حد سے سوا فسانہ ہوا

بھرا ہے شیشۂ دل کو نئی محبت سے

خدا کا گھر تھا جہاں واں شراب خانہ ہوا

ہوائے تند نہ چھوڑے مرے غبار کا ساتھ

یہ گرد راہ کہاں خاک آستانہ ہوا

خدا کے واسطے کر یار چین ابرو دور

بڑا ہی عیب لگا جس کماں میں خانہ ہوا

ہوا جو دن تو ہوا اس کو پاس رسوائی

جو رات آئی تو پھر نیند کا بہانہ ہوا

نہ پوچھ حال مرا چوب خشک صحرا ہوں

لگا کے آگ مجھے کارواں روانہ ہوا

نگاہ ناز بتاں سے نہ چشم رحم بھی رکھ

کسی کا یار نہیں فتنۂ زمانہ ہوا

اثر کیا تپش دل نے آخر اس کو بھی

رقیب سے بھی مرا ذکر غائبانہ ہوا

ہوائے تند سے پتا اگر کوئی کھڑکا

سمند باد بہاری کا تازیانہ ہوا

زبان یار خموشی نے میری کھلوائی

میں قفل بن کے کلید در خزانہ ہوا

کیا جو یار نے کچھ شغل برق اندازی

چراغ زندگیٔ خضر تک نشانہ ہوا

رہا ہے چاہ ذقن میں مرا دل وحشی

کنوئیں میں جنگلی کبوتر کا آشیانہ ہوا

خدا دراز کرے عمر چرخ نیلی کو

یہ بے کسوں کے مزاروں کا شامیانہ ہوا

نہیں ہے مثل صدف مجھ سا دوسرا کمبخت

نصیب غیر مرے منہ کا آب و دانہ ہوا

حنائی ہاتھوں سے چوٹی کو کھولتا ہے یار

کہاں سے پنجۂ مرجاں حریف شانہ ہوا

دکھائی چشم غزالاں نے حلقۂ زنجیر

ہمیں تو گوشۂ صحرا بھی قید خانہ ہوا

ہمیشہ شام سے ہمسائے مر رہے آتشؔ

ہمارا نالۂ دل گوش کو فسانہ ہوا