وہ سر نہیں جس میں ترا سودا نہیں ہوتا

وہ سر نہیں جس میں ترا سودا نہیں ہوتا

آنکھیں نہیں جن میں ترا جلوہ نہیں ہوتا

کیوں مجھ پہ کرم آپ کا مولا نہیں ہوتا

کیوں نذر کے قابل دل شیدا نہیں ہوتا

کب تک دل بیمار تڑپتا رہے آقا

کیوں لطف و کرم اس پہ مسیحا نہیں ہوتا

تیر نگہ یار کا کشتہ ہے مرا دل

جز مرہم دیدار وہ اچھا نہیں ہوتا

کیا خاک ملے اس کو مزا عشق کا تیرے

دنیا میں جو تیرے لئے رسوا نہیں ہوتا

کیوں چھپ کے چلے جاتے ہو ہم غیر نہیں ہیں

اپنوں سے جہاں میں کہیں پردا نہیں ہوتا

کشتہ تری دزدیدہ نگاہوں کا قمرؔ ہے

روتا ہے تڑپتا ہے وہ اچھا نہیں ہوتا

wo sar nahin jis mein tira sauda nahin hota

ankhen nahin jin mein tira jalwa nahin hota

kyun mujh pe karam ap ka maula nahin hota

kyun nazr ke qabil dil-e-shaida nahin hota

kab tak dil-e-bimar tarapta rahe aqa

kyun lutf-o-karam us pe masiha nahin hota

tir-e-nigah-e-yar ka kushta hai mira dil

juz marham didar wo achchha nahin hota

kya khak mile us ko maza ishq ka tere

duniya mein jo tere liye ruswa nahin hota

kyun chhup ke chale jate ho ham ghair nahin hain

apnon se jahan mein kahin parda nahin hota

kushta tiri duzdida nigahon ka qamar hai

rota hai tarapta hai wo achchha nahin hota