وہ دل نصیب ہوا جس کو داغ بھی نہ ملا

وہ دل نصیب ہوا جس کو داغ بھی نہ ملا

ملا وہ غم کدہ جس میں چراغ بھی نہ ملا

گئی تھی کہہ کے میں لاتی ہوں زلف یار کی بو

پھری تو باد صبا کا دماغ بھی نہ ملا

چراغ لے کے ارادہ تھا یار کو ڈھونڈیں

شب فراق تھی کوئی چراغ بھی نہ ملا

خبر کو یار کی بھیجا تھا گم ہوئے ایسے

حواس رفتہ کا اب تک سراغ بھی نہ ملا

جلالؔ باغ جہاں میں وہ عندلیب ہیں ہم

چمن کو پھول ملے ہم کو داغ بھی نہ ملا

wo dil nasib hua jis ko dagh bhi na mila

mila wo gham kada jis mein charagh bhi na mila

gai thi kah ke main lati hun zulf-e-yar ki bu

phiri to bad-e-saba ka dimagh bhi na mila

charagh le ke irada tha yar ko dhunden

shab-e-firaq thi koi charagh bhi na mila

khabar ko yar ki bheja tha gum hue aise

hawas rafta ka ab tak suragh bhi na mila

jalal bagh-e-jahan mein wo andalib hain ham

chaman ko phul mile ham ko dagh bhi na mila