وہ در تلک آوے نہ کبھی بات کی ٹھہرے

وہ در تلک آوے نہ کبھی بات کی ٹھہرے

حیراں ہوں میں کس طرح ملاقات کی ٹھہرے

ہر روز کا ملنا ہے جو دشوار تو پیارے

اتنا تو کرو قصد کہ اک رات کی ٹھہرے

جس وقت کہ ہم آئیں تو یہ چاہئے تم کو

اوروں سے نہ پھر حرف و حکایات کی ٹھہرے

اے دیدۂ تر تم بھی جھڑی اپنی لگا دو

اس سال تو برسات میں برسات کی ٹھہرے

کس چیز پہ پھر ہم ہوں گفتار تعین

دن رات کی ٹھہرے ہے نہ اوقات کی ٹھہرے

جب کاٹ کے دل پیر گئی ہووے جگر میں

پھر کیوں نہ چھری آپ کی اس بات کی ٹھہرے

ہر روز یہ چاہے ہے تری چشم کی گردش

اس مرکز خاکی پہ کچھ آفات کی ٹھہرے

اے مصحفیؔ اس وقت وہ مہماں ہے تمہارے

ہے گھات کی جاگہ تو، اگر گھات کی ٹھہرے

wo dar talak awe na kabhi bat ki thahre

hairan hun main kis tarah mulaqat ki thahre

har roz ka milna hai jo dushwar to pyare

itna to karo qasd ke ik rat ki thahre

jis waqt ke ham aen to ye chahiye tum ko

auron se na phir harf-o-hikayat ki thahre

ai dida-e-tar tum bhi jhari apni laga do

is sal to barsat mein barsat ki thahre

kis chiz pe phir ham hun guftar taayyun

din rat ki thahre hai na auqat ki thahre

jab kat ke dil pir gai howe jigar mein

phir kyun na chhuri ap ki is bat ki thahre

har roz ye chahe hai tiri chashm ki gardish

is markaz-e-khaki pe kuchh afat ki thahre

ai mushafi is waqt wo mehman hai tumhare

hai ghat ki jagah to, agar ghat ki thahre