وہ رنگت تو نے اے گل رو نکالی

وہ رنگت تو نے اے گل رو نکالی

نچھاور کو گلوں نے بو نکالی

مزاج بوئے سنبل کر کے موقوف

صبا نے نکہت گیسو نکالی

نہ تھی جانے کی اس تک راہ دل کی

چھری سے چیر کے پہلو نکالی

نکاسی جب نہ دیکھی یاس دل کی

بہا کے آٹھ آٹھ آنسو نکالی

ہماری روح اک رشک چمن نے

سنگھا کے پھول کی خوشبو نکالی

مرے صیاد نے بلبل کی میت

قفس سے توڑ کے بازو نکالی

کیا اس سے جو خوش چشمی کا دعویٰ

تری جائے گی آنکھ آہو نکالی

سلیمانی دکھا دی شان تم نے

پری رو مانگ وہ خوش رو نکالی

نکالا حسن کا ارمان تو نے

مری حسرت نہ اے دل جو نکالی

چمن میں بھینی بھینی بو نے ان کی

نہ بسنے دی گئی شبو نکالی

دہان زخم سے تلوار چومی

بہ شکل بوسۂ ابرو نکالی

قیامت کا شباب اس نے نکالا

شرفؔ چنگیز خانی خو نکالی

wo rangat tu ne ai gul ru nikali

nichhawar ko gulon ne bu nikali

mizaj-e-bu-e-sumbul kar ke mauquf

saba ne nikhat-e-gesu nikali

na thi jane ki us tak rah-e-dil ki

chhuri se chir ke pahlu nikali

nikasi jab na dekhi yas dil ki

baha ke ath ath ansu nikali

hamari ruh ik rashk-e-chaman ne

singha ke phul ki khushbu nikali

mire sayyad ne bulbul ki mayyat

qafas se tor ke bazu nikali

kiya us se jo khush chashmi ka daawa

tiri jaegi ankh ahu nikali

sulaimani dikha di shan tum ne

pari ru mang wo khush ro nikali

nikala husn ka arman tu ne

miri hasrat na ai dil jo nikali

chaman mein bhini bhini bu ne un ki

na basne di gai shabu nikali

dahan-e-zakhm se talwar chumi

ba shakl-e-bosa-e-abru nikali

qayamat ka shabab us ne nikala

sharaf changez khani khu nikali